manlalapo ed doipo na duaran papári, duaran akakawes na naugaliyan, tan sakey a teniente, ya wala ran manyodyurong ed liber na sakey a lamisaan a melag ya akagatonan day botbotilyay alak tan bisbiskuit a gawad Inglaterra.
Samay teniente masiken la, atagey, tan masebeg ya impanlupa; kaaliling toy sakey bilang a Duque de Alba (1) ya alingoanan ya atilak ed listaay guardia civil.(2) Mataltalag ya onesel balet ta no sinmalita ambelabelat tan naknakná. Sakey ed saramay papári, dominiko ya ugaw ni, maong a lakí, malimlimgas, atagey ed kakabatan a singa tagey na suri salming ton balitok, tan mabinbinta anta wala nid kalangueran; sikatoy kúra ed Binondo tan nanbangat ed San Juan de Letran (3) ed imbeneg iran taon. Bantog a maong a misangsangan ya ontan lay inábigan to ya nen panaon iran saray ának nen Guzman et onmamatalek niran misusupiatan ed totoon aliwa ran papári, si balitadon manangatonungán a B. de Luna agton balot alipeng ono narel, ya asumpalan to nia, ed gaway abig na panangatonungán nen pári Sibyla, so singa sumisigay a labay toy mangerel na igat a kalotan toy laso. Sayan dominiko mataltalag ya onesel tan singa to sisimbangen iray salsalita to.
Saman balet so sakey a pransiskano, malabilabir tan magalagalaw iray lima to no mansasalita. Angga- mán onggagapo lan nauban, aliwa nin matatken so nengneng to tan maong a laman. Say asimsimbang ya impanlupa to, kanenengneng ton makakebiew, malapar iran pangá to tan baleg ya impanlaman to, singa aliling toy sakey a mablin toon Romano ya nankinon pári tan kanengneng ed sikato, anggano ag gagalaen, nanunotay sakey ed saramay taloran papári a sinalitay sumusulat a Heine ed ulirán ton "Dioses Iran Impalis," a no na-
(1) Fernando Alvarez de Toledo, Duque de Alva. Sakey yan nibantog a maong tan masebeg a general ed panaon iran impanuley day Arin Cárlos V ton Felipe I (1508-1582) ya sikatoy anebseb na religion protestante ed bansa ran tatawagey Paises Bajos ed Europa (Holanda tan Bélgica natan).
(2) Say kipapasen da nen saman singa saray Konstabulario odino Po- licía Insular natan.
(3) Colegio ya ikokurang day papárin dominiko.
(4) Papárin dominiko.
