pesisaw so lupa to, ya saya akausdong ed banawang, tan
totumboken toy matay amin a galaw nen Ibarra. Dengdenglen so tanol na kutsara ya pankikiwal nimay largamasa tan say makalnan bosis da ray empliado ya
pipilisitaan day alcalde ed impansalita to.
Kabekta walay alarakarak: samay polea ed sengeg ton may kinonmakinan kiew, binmontatok ed tagey, intarok to may torno ya saya pinaspas ton anggaay kasil imay aparato; yinmugas iramay kiew, nibanbantak iray taker ya biglan abagbag ya abuybuyak ya amin a nikolasbong ed kakirem, ya tanol toy singa tinmerak a karol, tan bansag na inalimpokapok na makapal a lurem a dabok. Ingal a makakebiew na amin a totoon wadman ya agda amtay batikan da, tan pigpigaray amaarap di mad banawang. Bukor nen Maria Clara tan si pari Salvi so agira akaalis ed pasen a kawalaan da, ya ag ira akagalaw, ag ira makasalita tan amespesiaw so lupa ra.
Nen say dabok et nankalkalnan kinmepa, anengneng day Ibarran manalalagey ed utel da ran may nantatabonan a kiew, kawayan, kable, tan nanlaetan ton may torno tan baton baleg ya diad inkilosor to nian bigla et atalapos ton amin ya atapilan. Wala nid lima to ra may timban kawalaay largamasa tan kutsa ra, tan nengnengnengen ton singa ataktakot so bangkay na sakey a too ya akaunat ed saliyan to ya atapilay akamayamay a kiew.
“Ag kayo inatey? Mabilay kayo ni? Panangasi Dios, salita kayo kari!” kuanda ray arum ya empliado ya ataktakot met ira.
“Milagro! Milagro!” kuandan maningal na arum.
“Dago kayo tan walwalan yo yay bankay to niay toon andi palar!” kuanen Ibarra ya singa kabangobangon tod malet ya ugip to.
Nen nangel nen Maria Claray bosis nen Ibarra si nga naandiay biskeg tan nalmay ed taklay da ray amimiga to.
Baleg a gewgew so agawa. Amin da mangakaksion iran mansasalita, onia rad biek tan biek, onlasor irad banawang, onsegep ira, ya nanengneng so inkagulo tan inkataktakot da.
