“Siopay inatey? Mabilay ni?” tepet nen alferez.
Abirbir dad bankay imay lakin ampesisaw so lupa to ya manalalagey nen saman ed abay na torno nen agni abuyak so makina.
“Idalem itay maistroy panday!” kuay onan nibalikas nen alcalde.
Inimano ran maong so bankay, intapew day lima ra ed pagew to, balet agla ompaparok so puso to. Abansi ulo toy kiew ran manpaway so data ed sangi to, eleng to tan layag to. Anengneng da met ed beklew to so pigaran marka, apatiran nikesbeng ed sakey a diking tan diad pagpag sakey a baleg a kesbeng. No imimanoen nibaga ya saney a nman binmalatyang so anipit na beklew to.
Saray papari penipelicitaan day Ibarra tan pinapasamano ra. Samay pransiskano ya managdikta ed pari Damaso no saya et mansirmon, kuanton mannangis:
“Say Dios maktek lawas! Say Dios Marunong!”
“No nanunotan kon kasakbayan ton man a duknal et wadman ak,” kuay sakey a empliado ed kinen Ibarra, “no siak so unor, ay Jesus!”
“Siak balet manbegas so buek ko!” kuay sakey a duldolan.
“Maong ingen ta sikayoy wadman, ya aliwan siak !” kuay sakey a masiken a manggiwgiw ni.
“Don Pascual!” kuanday arum a kakastila.
“Kuanko tan,” inkuanton impatumbok, “ta si Sinyor Ibarra ag inatey; siak no agak atapilan inatey ak met lanlamang ed pannodnunot ko!”
Si Ibarra balet arawi lay kawalaan to tan linman kakabaten toy asumpalan nen Maria Clara.
“Sayan agawa agto isebel so pangituloy na pista, Sr. Ibarra,” kuanen alcalde: “Nagalanp- so Dios! Say inatey aliwan pari, -aliwa met a kastila. Panliketan tayoy inkilaban yo. Panon bilang no atapilan to kayon may bato ey!”
“Onlilikna la, onlilikna la!” kuay eskribano. “Kuan ko la, ta si Sinyor Ibarra linmasor a singa agto labaylabaven, unong ed impakanengneng ko!”
“Andi bali ta say inatey sakey ya indio labat!”
“Ituloy so pista! Musiko! Ag napaoli kaermenan ed bilay so inatey. Kapitan, nakaukolan ya onia diay
