Directorcillo ta gaween so paliwawa. Ipriso tay maistroy panday!”
“Isipo!”
“Susto tan, isipo! Eh! Musiko, musiko! Isipo tay maistrilloy panday!
“Sinyor alcalde!” kuanen Ibarra ya mabinbinta; “no say kaermenan agto napaolid bilay so inatey, lalon ag makapaoli so pangipirisoy sakey a toon ag amtan petepeteg no walay kasalanan to. Ebatan ko yan too, tan karewen koy kabulos to ed sarayan agew, no nayari.”
“Maong, maong, balet agto pipiduaen!”
Nambabangil a kutengteng day totoo. Say maslak a sisiaen da so milagro. Si pari Salvi balet singa agto panliliketan a maong iman a milagro ya ipapaakar dad sakey a santos na Togiop da ya wala nimet ed parroquia to.
Wala met lay mangibabaga ya walay anengneng ton too ya akakawes na mauriem a singa kawes day paparin pransiskano ya linmasor dimad banawang nen nalespak imay makinan-kiew. Anggapoy arum no ag si San Diego man, kuanda. Kuanda met na arum ya si Sr. Ibarra akimisad saman ya agew, balet ta si ampesisaw so kolor to, andi; kaniantm, maliwliwawan singa agew.
“Anengneng mola?” kuay sakey ya ina ed anak to: “Anggad agtaka dinusa agka akimisa: Sakey kamet komon ya itulor ed tribunal a binalkot ed ikamen tan ikariton!”
Yaakar da lad tribunal a tua may lakin ampesisaw so lupa to ono say bangkay to ya binalkot ed ikamen.
Si Ibarra linma lad abong ton mansalat. Si masiken Tasio balet, “Mauges a gapo;” kuanto ya iman la.
