Mansusumpal a manpapales si Ibarra nen impakabat na sakey ya igaganggan ya walay manaanap ed sikaton taga uma.
Inisip ton sakey ed saray kasamak to kanian imbaga ton palooben dan panalagaren dimad silir ya onkakanan panagbasaan to, kawalaan day liblibro, tan la boratorio to ono panagtimplaan toy nambabangil a tamtambal, ono bengat lan antokaman.
Baleg so inkikelawan to nen kaloob to et anengneng toy ambelabelat tan makaguloy nunot no maminsan ya indengan nen Elias.
“Utang kon linawa ed sikayoy bilay ko,” inkuan to nia ed salitay tagalog ta atebek toy inkikelawan nen Ibarra; “no bilang tinomangan koy daiset yan utang a linawa, kanian anggapoy nepeg yon pisalamatan ed siak. Linma ak dia ingen a mikasi....... ”
“Ibaga yo no antoy labay yo,” kuanen Ibarran inmebat ed salitay tagalog met, a lalon mantuboy kelaw to ed onman lan binbinta nen taga uma.
Sineleng nen Elias a ninengneng si Ibarra insan inmebat na onia:
“No say Okum diad tapew na dalin et salien ton paliwawaen so agawa natan, pikasik pad sikayo ya ang gapoy pangibabagaan yoy impamasakbay kod sikayo ed simbaan.”
“Agkayo mapaga,” kuanen Ibarra ya singa naalipanesan; “amtak a labay da kayon erelen, balet ta anggapon ugalik so manangitiktik.” “Ay, aliwan siak so makasengeg, aliwan siak!” kua nen Elias a tamtampol el tonoy bosis ton ag paisuri;
