“say makasengeg sikayon dildili. No siak anggapoy tatakutan kod saray totoo.”
Alour so kelaw nen Ibarra. Say pananalita ton man a taga uma, ya nen nakabat ton inmona et piloto so anapan to, duma, ya aliwa lan singa unong a gendat, tan singa ag ontukoy ed kipapasen to tan mairap a panbibilay to.
“Antoy labay yon ibaga ey ?” kuanton tinepet, a ban sag met na impaneleng tod saman a mairap a talusan a too. ,
“Aliwan masuliwet so pansasalitak; ta tatakpanen ko lawas so pangibesngaw koy kanunotan ko ed maliwawan panangibaga. Diad kaabigan yon dili. nakaukolan ya saray kakabusol yo et isinen da kayo ya ag mangaatap tan andigapoy paraan.”
Akasuner si Ibarra.
“Saray kakabusol ko? Akin wala ray kakabusol ko?”
“Amin itayo, sinyor, walaray kakabusol tayo, man iapod sanka andi kakanaan a bigis anggad too, maniapod sankamasegsegangan anggad sankayamanan tan sankamakapanyarian! Say panbubusolan sikatoy talontonay bilay!”
Si Ibarra ninengneng toy Elias ya andi esel.
“Aliwa kayon piloto, tan aliwa kayo met a taga uma!.....” kuanton makalkalna.
“Wala ray kakabusol yod atagey iran pasen tan wa la met ed saray abeba,” kuanen Elias ya intuloy ya agto inasikasoy imbaga nen Ibarra; “mangigagapo kayoy sakey a pamaakaran a makabaliksan, wala ray agawgawa ed panaon tan bilay day ateng yo ran inmona, say ama yo, say laki yo walaray kakabusol da ta totoo met iran walay liknaan, tan diad sayan bilay aliwan saray makasalanan ono mauges, no ag ingen saray maong a totoo ya maptek a panagnunot so dakel so mamubusol ed sikara.”
“Kabat yo ray kakabusol ko?”
Ag inmebat a tampol si Elias, ta nannunot na daiset.
“Kabat koy sakey, samay inatey,” insan to kuan.
“Kalabian naamtaan kon walay ipaparaan ton sumpad sikayo ed impakangel koy pigaran salitay sakey a toon agko kabat ya abalangan ko met ta inmutel ed karaklan
