“On! Siak so amenben ed sikato nen labay to lay ombatik, kapangigapo toy gawa ton mauges; anengneng kon petepeteg so kasalanan to. Niay ikuankod sikayo natan: paulian tayoy Dios a bukor toy mangokum ed saray totoo, tan bukor to met lambengat so walay pakauley ton mangiter tan mangekal na bilay; ag manepeg ya say too et is*pen ton nayarian ton sandian!”
“Sikayo balet natan.
“Andi” kuanen Elias a sinmalabat ya agto la apasumpal ta atebek to lay labay ton ibaga, “agto kapara. No say too et tutolan to ray arum a papatey ono deralen ton pasegsegangen so arapen dan bilay, gaween to yan walad kasiguroan ya anggapoy nagawad sikaton kaugsan, ya ikana toy biskeg day arum a totoon panumpal na tutol ya impaakseb to anta nayari ni nimet ya alingo. Siak balet diad impangipuger kod toon nankasalanan pian midamay ed kaatapan ya imparaan tod saray arum, wadmanak met ya ag pinmaliis tan akidamay ak met ed satan a kaatapan. Agko pinatey, no ag ta pinaulian koy limay Dios ya angekal na bilay to.”
“Agkayo manisia ed kibabana?”
“Say panisia ed kibabana singa met lan lamang panisia ed milagro: kabaliksan dan duay pangipasen a say Dios et agto kabat so arapen. Antoy talus na ki babana? Sakey ya agawa ya anggapoy akatalaran ono akaparaan. Say milagro ey? Sakey a sumlang, sakey a nagawan sumpa ed totuntonen a naugaliyan. Say ag pakapanparaan tan pansumlangan ya nagawa ed Pakatalus a mangikukurang na sansmakoban, kabaliksan day duaran kakulangan ed satan a Pakatalus ya nasnaspot.”
“Siopa kayo tan petepeteg?” kuan lamet a tinepet nen Ibarra ya tarok toy daiset a paga; “nanaral kayo?”
“Akaukolan kon impeket a maong so pananisiak ed Dios ta abalang koy pananisiak ed saray katoowan.” kuay ebat nen Elias ya niliktaran toy tepet ed sikato.
Diman atebek nen Ibarra so liknaan tan panagnunot ton man a toon napapaunong: agto bibirbiren so kapteken diad tapew na dalin; agto onabobon ed pankatonungay too ya mangokum ed saray kapara ton to-
