kapantatalusan kami met, tan ontan lay impakagusto rad siak a nen kayari taloy taon et nialisak ed sakey a báley a mas baleg ta inatey so kúrad man ya indio, mannangis iran amin, pinanó da ak na rigalo, intulor da ak na músiko . . . . ."
"Sa balet so labay ton ibagan tan labat....."
"Alagar kayo, alagar kayo! Agki kari maganat! Samay sinmalat ed siak mas aganod man, et nen inmalis mas dakel so angulop, mas dakel so mannangis, mas dakel so tugtog, anta mas makabil insan intatagey to ni dobli lawari babayaran ed simbaan. . . . ."
"Abuloyan yo ak pan
"Wala ni mas nen satan, nanayam ak ed báley na San Diego tan pigpigay bulan ni . . . . . inalis ko (singa inmuges diay liknaan to). Duamploy taon, agyo napaandi ya masulosulok lan pikakabat ed sakey a báley. Anem a libo so tood San Diego tan kabat koy sinansakey ed sikara ya singa pinianako tan pinasusok: amtak no iner so kikileyan to nia, no iner so sasakitay sapatos ton man, no siopay onkakaraw ed sayan bii, no anto ray naplagan to nia tan no siopay akaderal ed sikato, no siopay peteg ya amá to nian ugaw a laki, tan arum ni, ta kukonpisaren ko ran amin, insan maseet iran manusumpal na nabebetangan dad religion. Mansalitay Santiago ya akanabong dia no mantitila ak; maawang so daldalin tod man tan diman kami akapankakabat tan nankakaaro. Nengneng yo no panoy ásal na indio; nen onsipot ak, pigpigaran akukulaw tan hermanos terceros so angitulor ed siak anta duamploy taon kod man!"
"Agko balet nanengneng so akibibiangan ton tan ed pangiabuloy na bulos a pankomirsioy tabako!") kuanton may tubonbalon balangabalangaay buek to, ya sinambot toy impakatonda ton may pransiskano ya oniinom na sakey a kopan álak na Jerez.
(1) Say impangian ed limay Uley na amin a pakauley nipaakar ed panagpatanem. panagtipon, tan panaglakoy tabako ginmapo legay uley nen Kapitan General Basco de Vargas (1778-1787) ya ginawé yan pamapawayan na pilak a gastosey Uley tan pangiter met na seet ed ibolaslás na panagtanem. Balet ta nambabangil a lamés so agawad saray indio, kanian pinaer lan lamang yay Uley nen taon ya 1881 ed pilalek ton mangitukoy na kurang na uley ed nasasalatan ya kurang met na panaon.
