da, ta piano agmo amtan ipaalagey so apatiran dingding insan mo tarongan ta satan met labat so nakaukolan ed manggaway iskuilaan!"
Amin day wadman nilimgis day Ibarra, saya balet, anggaman pinmesiaw so lupa to, intuloy toy pitotungtong tod María Clara,
"Nunot yo balet ta........"
"Nengneng yo," kuanen pransiskano ya binaat toy alcalde, "walay sakey ya oldog(1) ed sikami ya sikato lay sanka murengan ed saray ibiba to, angipaalagey na sakey ya hospital a marakep tan mamura. Sadiay panagkimey day inaala ton panday a say ibabayar tod sikara waloran kuarto(2) (kakapat) labat ed sanagew ya anta manlalapo nira ed arum a báley. Saman so amta toy gaween to, ya aliwan singa saray dakdakel ya atapis a mistiso, ya dederalen da ray panday ya oupaay talora onó apatiran real(3) ed sanagew.
"Antoy kuanyo, babayaran to ra labat na waloran kuarto ed sanagew? Agmet nayári!" kuanen alcalde ed pilit to komon a mangibalang tan mangipaarap ed sananey a tungtongan.
"On, tan sikatotan komon so nepeg ya aligen day amin ya ipapásen day inkasikaran maong a panagnunot a kakastila. Amta yo la, nanlapod impanggaway Canal de Suez say kaugsan agangganon akasabí dia. Nen samay mairap ni manbaroy ta nakaukolan ni onliber ed Cabo, anggapo ray dakel a mauges a toon makasasabi dia tan ontan met ya anggapoy dakel a makakaakar diman a naderal!..."
"Balet ta, pári Dámaso. . . . !"
"Amta yo lay ugali indio: no akaaral na daiset, mankabatkabatan la! Amin iratay manmoteg a makakaakar ed Europa...."
"Maya pa, balet. . . . . ! " kuanen alcalde ya napapagaan lan maong ed tangás na panagsalita nen pári Dámaso.
"Nasumpal iran amin ed kanepegan da," kuantonsi ansia ya intuloy; "mapatpatnag so limay Dios, naka-
- (1) oldog -- Sikatoyay panangingeran dad saramay nanaral a manpári et agda nasumpal ta makapoy so uló ra odino pakatalus da. Akakawes met iray kawes na pári balet ag irá makapanmisa, agda nayariay mangonpisar, etc.
- (2) waloran kuarto -- Tinggal natan.
- (3) talora ano apatiran real Say sakey real nen saman petek toy labinduan sentimos tan sakey melag (kapalduay sentimos) natan.
