lamew tod panamulongan a singa toak inturón malinlinew a pinapauges, ya itoldon to ray karaklan a mamusol ed siak; pinalabás kon agak inmesel. Natan linma dia lamet a pinegdat toak ya áyaten a mikulkol; mankelaw kayo la ed impantepel kon andi esel ed amin ya imbábaga ton nanlapod insabí to dia, balet ta ginapoan to lamet a pasákitan tan lemlemewen so sankamasagradoan a pakanunotan ed liknaan na saray ának .......... Sikayo ya akaarap dia natan, papári, manangukom, anengneng yoy matatken lan amá yo ya andi tonda ton mansasagpot ed pangiter toy nakaukolan yo, tan akisíyan ed sikayo nisesengeg ed kaabigan yon dili? Anengneng yon inatey ed baleg a ermen to, tan kabukbukoran to kalamor ed sakey a pangawan, a mandageyem ed pilalek ton minengneng ed sikayo tan onsipot komon ed saray taklay yo, ya anggapoy anggan sakey a makaligliwa ed sikato, bukbukor to, agmakayari..
ya sikayo balet et wala kayo ed arawin dálin. . . . Akabatan yo ed kaunoran a nilemlemew dan inekalay galang so ngaran to, asabí yon andid lubok to nen sinmingger kayon napnoy ermen a mandasal? Andi? Agkayo onesel, no ontan sirin tutolan yo!"
Intagey toy lima to, et masiglat ya aliling na liwawa, sakey a bii pinmegley tan sinangga toy mayumis to ran lima so taklay ya ombabales. Saman a bii andi arum no ag si María Clara.
Nilimgis nen Ibarra ya mapatpatnag irad mandarlang a matá toy inkakuliteptepay kalakal to. Nankalkalnan linmokak iray gamet day lima to ya naikbanan to may pári tan sankaegnaan ton yúro, pinepet toy lupa to, tan batik lan sinmelak ed utel na katoowan.
