Agangganón binmawag ed báley so agawa. Anggapoy malabay a manisia nen kagapo, et nen apapaway dan tua manaya, agda naopoupot na totoo so pankelaw da.
Sakey tan sakey, unong ed suri kaptekay panagnunot to, mangibabagay walan kaisipan to.
"Inatey lay pári Dámaso!" kuanday arum; "nen bangonen da naames na dalay lupa to tan agla onlilínawa!"
"Panpainawaen la komoy Dios balet ta no tongtongey tua, nanbayar na utang to. Ag amta no antoy panawag na ginawa tod konbinto niman nen kabuasan."
"Antoy ginawa to a? Kinabil to lamet si coadjutor?"
"Antoy ginawa to? Anto? Tungtong mo pa!"
"Anengneng yo niman nen kabuasan so sakey a mestison kastila ya pinmaway ed simbaan a dinmalan ed sakristia?"
"On! On, anengneng mi. Naimano met nen pári Dámaso."
"Amtayo ..... kayari sirmon impatawag to, tan tinepet to no akin et pinmaway. 'Agko natalusay salitay tagalog, ama,' kuanton inmebat. ―'Akin et balbalawen mo sirin ya imbagam a salitay griego ey?" kuanen pári Dámason maningal ya bansag na impanampal to. Inebatan nen sakey, nanponitiyan iran anggad agdara binelsay."
"No nagawad siak itan..... " kuay sakey ya estudianti ya inmeremeré.
"Agko abobonay ginawa nen pári," kuay sakey met ya estudiantin inmebat, "ta say Religion ag manepeg ya ipasout ed anggan siopa ya ipasen a dusá odino
