Naplag lawari nen pári Dámasoy kopa ed gaway inkikelawan to. Ninengneng ton sineleng imay tubonbalo tan:
"Anto? Anto?" kuanton masiadoy kelaw. "Agyo nanengneng so maliwawa nen say agew? Agyo nanengneng, anak na Dios, ya amin ya ibabagak et pakanengnengan a malinlinew a saray pamapasimbalo ray Ministro na itsuray kurang na Uley dia et agmanepeg?"
Kangel tod saya may tubonbálo singa amanga; samay teniente pinmalaloy inkasilot na kirep to; samay dominiko imbeneg to ra.
"Manisia kayo sirin....?" kuanton may tubonbalo ya tinepet a mabinbinta nen akasalita, ya nengnengnengen ton singa ousisa en si párin kaarap to.
"Manisia ak? Singa pananisiak ed Evangelio! (Salitay Dios) Anggapoy mas mangiras nen say indio!"'
"Ah! Itepel yo pay isalabat ko," kuanen tubonbalo ed makalnan bosis, tan insingger toy daiset so yurongan to; "angibalikas kayoy sakey a salita ya masiadoy pilalekon kabatey katuaan to. Tua kasi ya wala tan a ngiras ya iba da lan inanak na taga diad sayan bansá, odino say kagagawa et singa kuanton may sakey a managbaroy a sankaili ya ipaparungtal tayo yan ngiras na indio ya kuan ta pian nasanibay dílin ngiras tayo, say matantan a kurang tayo, tan say itsuray panouley tayo ed wala rad silong na pakauley tayon bansa? Say sasalitaen ton man a too, bansa ran ouleyan, a saray manaayam et anggapoy duma rad kolor ...."
"Ha! Siblet! Tepet yod kinen Sr. Laruja ta kabat to met layan bansa, tepet yo no walay makapiparad kalamangan tan ngiras na indio!"
"Tua tan," kuanton inmebat nimay melag a lakí: "iner man a pasen diad tapew na dálin agkila makanengneng na mas mangiras nen say indio, iner man a pasen!"
"Ni mas mabisio, ni mas malamang!"
"Ni mas mauges ya inkabangat!"
Samay tubonbalo lingawlingaw a singa napapagaan.
"Sinyores," kuanto ed abeban bosis, "wala itayod abong na sakey a indio, saratan a mamárikit..."
"Bah! Anto latay pága yo! Si Santiago agto ipapasey laman ton indio, sakey ni andi dia. . . . . tan
