ween to natan. Tan ompan bilang ontakut so báley et ag onesel, saray kakaaro to. . . ."
"Anto balet so nagawaan tayo ey?" kuanen kápitan ya sinmalabat, "anto bilang so nagawaay báley ey? Anggan anto ni tay nagawa, saray papári lawas so walad katonungan."
"Lawas ya walarad katonungan ta lawas tayo ran iitday katonungan," kuay ebat nen Don Filipo ya inmalipanes, tan inkasil ton imbelabelat so impangibagá toy "lawas". "Maminsan pa ya say laman tayon díli so itdan tayoy katonungan ta insan itayo manpapalinewan!"
Ginogo nen kápitan so uló to, tinmangay ed atep tan inkuan tod bosis ton anapakseng: "Ay, say petang na dalá! Singa samay agyo ni amta no iner so kawalaan tayon bansá; agyo ra kabat so kabaleyan tayó. Saray papári mayaman irá ya malet so aroan da ono impankakaulop da; sikatayo mairap itayo ya abuybuyak ono nansisiyan itayo ni nimet. Dalí! Sáli yo pan ilaban a pilaan ta nengneng yo no agda kayo tinaynan ya amin ya impakulasuong!"
"On!" kuanen Don Filipo ed bosis a napnoy pait, "ontan a peteg so nagawa no say panagnunot tayó et nanparay takut tan benbey linawa; mas so pangaasikaso tayod kaugsan ya andi kabaliksan nen say kaabigan a nakaukolan; say tampol a manaari ed nunot tayo say takut, makulang itayoy sekder; sakey tan sakey, lamán to labat lav nonunoten to. agtayo ra nonunoten so arum a totoo, kaniantin malétey itayo tan sarasarag da itayo. Agsi gayugoy na ikol, agsi agtoy saklor, a kuan!"
"Dalipa, panonaen yo pa ran nunotey arum a totoo nen say lamán yon díli ta nengnengen ko no agdakayo pinaulian ditan ya asabit! Agyo ta amta may kuay kastila ya say tuatuan panangasi, onggapod inkasikan dili?"
"Magmaong ni laingen ya ibagá yon say tuatuan kapayotian et onggapó ed arod laman a díli tan mansampot ed kababaingan!" kuanen teniente mayor a makapasnok la. "Natan a tultuloy iparungtal kod alcalde so pangikban kod bebenbenan kon betang. Naksawanak lan naluludlurey labat ya anggapo met lan lamang so
