nagagawaan kon kaabigan ed anggan siopa! ..... Taynan takayo lad tan!”
Saray bibii duma met so kaisipan da.
“Ay!” kuanton inngesua. na sakey a biin magmaulimek so nengneng to; “ontan da lawas na tubonbalo! No mabilay komoy inato, anto la kasi kuanto? Ay Katawan, no nanunotan kon nayarin ontan met so nagawad kinen anako ta masiado met a maipepetang ya ulo! . . . . Ay, Jesus! Ngalngalik lan panibegay ina to ya an di lad bilay ompatey ak ed ermen ko no anako!”
“Siak balet,” kuay sakey met a biin inmebat, “agko panermenan no ontay nagawa ray duaran anako.”
“Antoy kuanyo, Kapitana Maria?” kuanton may inmonan nansalita ya impan dakudakop toy sanduan lima to.
“Labay ko lawas ya saray anak et yagel day pakanunotan ed saray ateng da, Kapitana Tinay; “antoy kuanyo no nasabisabi bilang so agew a nabald kayo tan narengel yon papaugesen day asawa yon inatey la, insan si anak yon Antonio et, itewek toy ulo ton ag onesel ey?”
“Agko la iter so bendision ko!” kuan met na komatlo, si Hermana Rufa, “balet ..... ”
“Ay agko igimor so bendision ko, andin balot!” kuanton sinmalabat nen mapangasin Kapitana Tinay, “say sakey ya ina agto nepeg itan ya ibaga .... balet ta agko amtay gaween ko agko amta ipatey ko anganko no bilang .... andi met! Dios ko! Agko la anganko labay a nengnengen! anto ra tan met so onsesebang ed ulo yo, Kapitana Maria!”
“Ontan man,” kuan lamet nen Hermana Rufa, “ag manepeg a lingoanan a kasalanan a makapatey no limaan so pari ono totoo ran sagrado.”
“Lalon sagrado so pakanunotan ed saray ateng!” kuay ebat nen Kapitana Maria. “Tan anggan siopa, ni say dilin Papa, tan lalo lay pari Damaso, anggapoy pankatonungan ton manmurmura na satan a masantos a pakanunotan !”
“Tua!” kuanen Kapitana Tinay ya amamayoen toy kakabatan dan may duara; “iner tay pangaalaan yoy abig na panangatonungan yo?”
“Sa balet so excomunion tan say kapelag ed inpiernos ey?” kuanen Rufa ya inmebat. “Antoy kabaliksay galgalang tan ag ataldengan a ngaran diad sayan bilay
