no nakondina itayod man ed bilay a sakey ey? Onlabas ya amin diad tapew na dálin..... sa balet so excomunión..... say panmurmuran pangitagey na lima ed sakey a ministro nen Jesucristo..... say makapirdona labat nitan say Papa!"
"Pirdona ey Dios ta igaganggan ton igalang so ama tan ina; say Dios agto excomulgaen! Tan niay amtak ya ibagad sikayo ay; no onlad abong ko, patuloyen ko tan pisalitaan ko; no walay anak kon bii, labay kon manugangen: ta say maong ya anak, maong met ya asawa tan maong met ya ama, manisia kayo, Hermana Rufa!"
"Siak balet aliwan ontay panagnunot ko; anggan antotay ibaga yo, anggano singa wala ni pankatonungan yo, mas ni pananisiak ed kúra. Manonaan ya ilaban ko say kamareruak, antoy kuanyo, Kapitana Tinay?"
"Ay! Antoy labay yon ibagak ey? Sakey tan sakey ed sikayo walay katonungan to; wala met angankoy katunongay Dios! Agko amta, ta siak sakey ak labat lan longak... Say amtak so ibagak lad anako ya ontonda lan manaral! Say kuanda ta saray makabat ompapatey irad bitáyan! María Santísima! Insan si anako labay toy onla ed Europa!"
"Antoy kanunotan yon gaween ey?"
"Ibagak ya alga onaarawid abay ko, ta anto tay pakakaukolay kakabatan? Nabuas ono nabuas a sakey ompatey itayo met lan lamang..... ompatey so makabat, ompatey so mangmang. . . . . say kuestion say manbilay so toon mareen." Insan manngesúa ya intagay toy matá tod tawen.
"Siak balet," kuanen Kapitana María ya mabinbinta, "no mayamanak labat a singa sikayo paulian ko ray anak kon manbaroy; wala ni rad kalangueran tan nakaukolan ya ompasal ira ed isabí agew ya kanagnap dala ed kalakal..... siak maganó lay panbilay ko.... mannenengneng kami lad man ed bilay a sakey manepeg a saray ának et takpanen dan napalumbasan so arapat day ateng da, tan no wala ran lanang ed abay tayo singa laran singa ugaw, ag ira makaaral a manbilay a bukor."
"Ay, sansananey iray kanunotan yo!" kuanen Kapitana Tinay a nisegawan tan mandakudakop; "singa agyora nanirapan ya inanak iramay duaran siping yo!"
