"Manlapod nanirapan ko ran inanak, pinabaleg tan impanaral ya anggano onia lay kairapay panbibilay mi, agko labay ya anta ontan lay impansagpot ko ed sikara et manmaliw ira labat lan tootoo.....
"Singa agyora amo inaroy ának yo ya unong na igaganggay Dios!" kuanen Hermana Rufa ed tonoy bosis ya ambelabelat.
"Say baleg a tepel, balet ta nandurumaay panangaroy iná: walaray say panangaro rad saray ának da et walad pangipuger dad saraya ed abay da ya maliket laran anggano ag ira makataew ed bilay dapot labat ag ira naalis ed matá ra; walaray inaro da ray anak da ta lapo labat ed ának da ra; walara met so say panangaro ra et walad pilalek dad dílin kaabigay ának da. Sakey ak ed sarayay unor ta ontay imbangat na asawak ed siak."
"Amin iratay panagnunot yo, Kapitana María," kuanen Rufa ed tonon singa mansisirmon, "ag ira ontukoy ed ibabangat na Religion; loob kayo pan Hermana na Smo. Rosario, Hermana na San Francisco, ono Sta. Rita, ono Sta. Clara"
"Hermana Rufa, no onkana ak lan miági ed saray totoo, insan ko salien so miági ed saray sasantos!" kuay ebat nen Kapitana María ya makakaimis.
Ta pian nasumpal la yan tekap na salsalita, tan piano saray manbabasa et naamtaan da met no antoy walad nunot day yanoyanon pakaisip ya tagá uma, onla itayon magano ed plaza, diman ed silong na impaalagey a tolda ya pantotungtongan day pigaran kataon sakey ed sikara et kabat tila ta saya may lakin mapalaloy ibeg to ed saray doctor na Medicina.
"Say likliknaen ko," kuanto nia, "ta agla nasumpal so eskuilaan!"
"Anto? Panon?" kuanday arum ya tinepet.
"Agla makapandoktor si anako anganggaan to lay komakaríton! Anggapo la! Anggapo lay eskuilaan!"
"Siopay akankuan ya anggapo lay eskuilaan?" kuay tepet na sakey a taga uma met a maong a laman, mapangal tan melag so uló to.
"Siak! Saray papárin ampoti tinawag day Don Crisóstomo na plibastiero. (1) Kaniantin agla natuloy itay eskuilaan!"
- (1) plibastiero Say suston panangibaga "filibustero".
