No panoy kagúguloy nunot day totoo, ontan met so agawan guló ed abong nen Kápitan Tiago. Sinanangis si María Clara ya agto dedengeley pankukuyong ed sikato nen Tia Isabel tan si agi tod sosó ya Andeng. Tan say makasengeg ta sinebelan nen ama to ya misalita ed kinen Ibarra anggad agda pirdonaey papári ya ekalen so inka excomulga to.
Si Kpn. Tiago, anta ngalngalin agto la nagugoy anggatel to tan masiado lay kesaw ton mangipaparaan na abong ton pamarawesan tod Kapitan General, impatawag da lamet ed konbinto.
"Agka la onnanangis, anako," kuanen Tía Isabel legan ton manpupunas a mamapasileng niray espejo; "paulian mo ta naekal lan lamang itay inka excomulga to..... mansulat ira ed Papa ..... manggawa itayoy baleg a payabol..... Naalimureng labat si pári Dámaso..... agmet inatey!"
"Agka onnanangis" kuan met nen Andeng a makalkalna "siak so akauley pian makapantungtong kayo; antoy kakanaay panag konpisalan sirin ey no ag mankasalanay too? Ibaga labat so kasalanan ed kúra et napaandi la!"
Pinmawil a siansiay Kápitan Tiago. Saramay bibii minataan dan tampol so lupa to ya diman da anapey ebat ed akamayamay a tepet ya agdala nibesngaw. Sa balet so lupa nen Kpn. Tiago singa nalnes. Manlinglinget, aplos lan aplos na muling to ya anggapoy nibaga to.
"Anto Santiago ey?" kuanen Tía Isabel a napapagaan
Saya ag akasel, nginmesway balbaleg, insan pinunasan toy lua to.
"Ebat ka karí! Antoy agawa?"
