"Sikato la yay papagaan ko!" kuanto nen akasalita ya akisakisan, "Aperdi lan amin! Si pári Dámaso pabubuyak toy sipanan ta no andi kono, nakondina ak ed sayan bilay tan ontan met ed bilay a sakey! Sikatoyay kuandan amin ed siak, pati si pári Sibyla! Agko kono pasegepen diad abong..... wala balet so utang kod sikaton limamplon liboy pisos! Imbagak ya ed saray papári et agdaak dengelen: ―'Dinay labay mo,' kuandad siak, 'limamplon liboy pisos ono say bilay mo tan kamareruam?' ―Ay, San Antonio! No amtak labat ya onia, no amtak labat ya onia!"
Manogaog a mansibsibek si María Clara.
"Agka onnanangis, anako," kuanto ya inarap to; "agmo naaligay inam ya ag onnanangis a balot say inanangis to labat et diad manginew.... Say kuanen pári Dámaso ta wala konoy kanayon ton sinmabin nanlapod España ya itátalaga ton mangasawad sika...."
Nanpepet na layag toy María Clara.
"Antoy agawam, Santiago, nanaambagel ka?" kuanen Tía Isabel ya iningalan to, "panon mon piasawaen ed sananey? Say isip mo sirin satay anak mo ay mansalat na nobio ton singa panagsalat toy aysing to?"
"Sikato met itay walad nunot ko, Isabel; mayaman si Don Crisostomo . . . . say pangaasawaan da labat na kakastila say liket dad kuarta . . . . . balet_ta_antoy laby mon gaween ko ey? .... Excomulgaen daak met kono.... say kuanda ta aliwá labat lan say kamareruak so walad kaatapan no agta pati say laman ko met. . . .say laman ko, amtam? Pati say laman ko!"
"Anganggad gagaween mo lolooren moy ermey anak mo! Agmo ta kaaroy arzobispo? Akin et agmo sulaten ey?"
"Si arzobispo pári met lan lamang, kanian no antoy ibaga ray papári sikatoy gaween to! Agka la onnanangis, María; onla diay Kapitan General, labay to kan pinengnengan insan ambalbalanga ray matam..... Ay antolaya! Say inisip ko la wari malikeliket so pamalabas koy ngarem!.... no ag komon sinmabí yan segsegang ay, siak natay sankaliketan a tood tapew na dálin, panibíbegan daak komon ya amin! . . . . Sia la, anako; nengneng mo pa, lalon masegsegang ak nen sika et agak onnanangis! Sika nayari nin makalmo kay mas maong a piasawaan mo, siak balet talagan napirdiak na li-
