mamplon liboy pisos..... Ay, Virgin ed Antipolo, maong lanti komon no manbuenas ak naani no lábi."
Mankilalbong a paltog, kalarakar na dalig day luganan, mapanakpak a batik day kagayo, banday músiko ya manotugtog na Marcha Real, sikarayay angipakabat na insabi na Sankatageyan ya Kapitan General na Kapoloay Pilipinas. Si María Clara batik ya inmamot ed silir to . . . . pangaskasiyan a bii! Panggagalawan day pusom na lima ran maramsak ya agda kabat so yumis tan inkaletey to!
Napapanoy abong na totoo; akar iran makmasil, bosis ya mangiiter na ganggán, pantatankíyay sable tan espuelas so narerengel ed biek tan biek; si María Clara balet wadman kalamor a napnoy ermen a medio mantaltalimokor ed arap na estampa na Virgin Dolorosa ya gawa nen pintor Delaroche, ya impinta ton onman lay ermen tan kabukbukoran to, ya singa to bilang apesgaan nen ompapawil ya angiponpon ed bogbogtong ya anak to. Si María Clara balet, agto nonunotey kaermenan ton man a Ina, ta say nonunoten to say ermen ton díli. Diad pakanengneng ed sikato ya tewek so uló tod pagew to, tan akagaton iray lima tod tabla, aliling toy mayumis a sengeg na azucena ya alekné ed indalay bagyó. Say arapen ton bilay ya andukey a taon ton pikugip tan inalila, saray pilalek ton dápaten a nitanem irad kaugawán to tan iba to ran binmaleg a sikaray mangiiter na dílin bilay to, natan labay da ran tiguayén, ya singa bilang sakey a salita labat et masarag lan makapunas ed sikara ed puso tan kanunotan to! Singa kabaliksay pamatondad parok ton man, tan pangerep na liwawa to nia!
Si María Clara maong tan masantos a kristiana tan ontan met a maaron anak. Aliwa lambengat ya antakut toy excomunion; no agta say kaatapay bilay tan kareenan nen amá to, tan say dílin ganggán to nia, kakaukolanen dad sikato so pangilingoan toy aro to. Natanto la abilibilín peteg so kaaralem tan biskeg na panangaro tod Ibarra. Kaaliling to nen ona so sakey a ilog a managagos a mareereen; ambalbalingit iran rosas so mansamiong ya amarakep ed gilig to, tan say aagosan toy pinopinon buer. Malinlinak ya andi wari nanengneng a burakan tan binel ya nayarin ibaga no imimanoen a singa tinmondán onaagos. Balet ta biglán inminget so dadalaney danum, makmakdém iran bató so
