"Labay kon pisalitaan itan a tubonbalo!" kuanen Kapitan General ed sakey ed saray ayudante ya angulop ed sikato; "aliing ton maong so pililiknak."
"Wala lay linman manaanap ed sikato, Sankatageyan kon General! Wala met dia balet so sakey a tubonbalon taga Ibale ya ipapasout toy paikabat ed sikayo. Imbagá mi lad sikaton anggapoy lugar yo, say inakaran yo dia et nengnengen yo labat lay báley tan mamalabas kayoy libot ya aliwan ondengel ed saray totoo, balet ta kuanton inmebat ya wala lawas konoy tiempo yon mangiter na kaptekán"
Linmingaw si Kapitan General ed alcalde, ya mankelaw.
"No agak nalilingo," kuanton nia, ya intewek toy daiset, "saya may tubonbalo ya akapiebatay daiset ed pári Dámaso nipapaakar ed sirmon."
"Sananey lamet? Anto tay gagala ton tan a pári, guloen toy lapag na lúyag, odino inisip ton sikatoy makauley dia? Paloob yo!"
Si Kapitan General mamaspasiar ya ag makareen ed biek tan biek na salas.
Dimad caida wadman iray pigaran kakastila ya kalimog da ray militar tan manouley ed báley na San Diego tan báley iran kabkaabay, ya apulokpulok iran mantotungtong ono mansusupiatan. Wadman met iray amin a papárin nibanan wadman ed saman a báley, likod labat si pári Dámaso, ya labay da met so onlooh ya mangigalang ed kinen Kapitan General.
"Papaibaga nen Kapitan General ed Saray Kagalangan yo, ta kasian konon manalagar kayoy daiset,"
- (1) Caida ― Pasen na abong ya kasegep ed takayan, kasakbayay iloob ed salas.
