tan ontan da met na totoon susto ed inkabangat, gagala mi met so mangipasabi ed sikayo ed ngaran na magalang met ya managlingkor ed katageyan yo, ya adatngay segsegang..."
"Oh!" kuanen Kapitan General a sinmalabat ya patpatleken toy taburete ed sakey ya sali, tan makakaimis balet a singa met naninirbios, "no amin a managlingkor ed 'Katageyan ko' et singa si magalang a pári Dámaso, mas lablabayen ko lan siak lan díli manlingkor ed 'Katageyan ko'!"
Saramay papári ya anta abará lara lantin akaalagey, lalo lamet ya abarán pati kanunotan da ed sayan insalabat nen Kapitan General.
"Yurong kayo. . . . ." kuanton impatumbok nen nagogonoyan, a pinasamit toy daiset so tonoy pananalita to.
Diad saya, linmoob si Kápitan Tiago ya nankawes na frac tan mankulandit, ya iba ton sankadawat ed limay María Clara ya saya, anggaman singa mapagpaga tan nasisikig, siansian napnoy gracia ed mababig ya impangigalang to.
"Sikaray anak yo?" kuay tepet nen Kapitan General a nikelawan.
"Tan anak yo met, (1)Sankatageyan a General," kuay ebat nen Kpn. Tiago ya mabinbinta.
Si alcalde tan saramay ayudante minmoldag so matá ra ed inkikelawan da, si Kapitan General balet mabinbintan angiawat ed María Clara na lima to ya nankuan:
"Mapalar iray ateng a walaray ának dan singara sikayo, sinyorita! Sinalita da kayo ed siak ed baleg a pandayew tan panamagalang..... tan pirawat ta kayo ya nanengneng pian niiter koy pisasalamat ko ed marakep a pamaakaran ya ginawa yod sayan agew. Amtak ya amin so agawa tan diad pansulat kod Gobierno na Sankatageyan ya Ari tayo, agko lingoanan ya bitlaen so masurin ginawa yo. Natan balet, abuloyan yoak pa, sinyorita, ya diad ngaray Sankatageyan ya Ari
- (1) "Tan anak yo met" — No tuntoney maong ya inkabangat, say naugalíyan ed saray kakastila so say makankien na anggan antotan no waláy mánepet ono mangidayew, nakaukolan a yebat toy 'kien yo met" odino "walad disposición yo." Si Kapitan Tiago dia sirin apalakbatan to yan ugali ray kakastila.
