ya ilalaman ko dia, ya ontan lay panamabli tod panbilay a mareen tan ag kasigensigen day matour a totoon walad silong na pakauley to, tan dia met ed ngaran kon díli, ya sakey ak met ya ateng ya walaray anak ton bibii ya kataonan yo, et iter kod sikayoy baleg a pisasalamat, tan ontan met ed pangiparungtal koy ngaran yo ya pangerew koy pangiter ed sikayoy sakey a marakep a túmang."
"Sinyor!...." kuanen María Clara ya manggiwgiw.
Atalusan nen Kapitan General so labay ton ibaga, kanian oniay imbalikás to:
"Tuan peteg, sinyorita, ta masarag lay linak na kanunotan yo tan say panamabli ray kabaleyan yo ra: birbiren ko ya anggapo met la ingen so ontaloná ed satan a túmang, tan agla manepeg so ikerew tayo na arum ni. Balet ta agyo pa igigimor ed siak so sakey a marakep a pankanawnawa ya mangipanengneng a no say Kaptekan et amta toy mangiter na dusa, amta to met so mangiter na túmang tan aliwan lawas a bulag." Amin iray salsalita ya insulat na duma imbalikas to ra ed tonoy basis ya atagey tan nantarok na kabaliksan.
"Wadiay Sr. Don Juan Crisóstomo Ibarra ya manaalagar na iganggan yo, Sankatageyan a General," kuay sakey ya ayudante ed maksil a bosis to.
Nisegawan ya akigtot si María Clara.
"Ah!" kuanen Kapitan General, "abuloyan yoak pa, sinyorita, ya mangibesngaw na pilalek kon minengneng lamet ed sikayo kasakbayay itaynan kod sayan báley, bangta dakel ni ray makabaliksan a labay kon salitaen ed sikayo. Sr. alcalde labay kon ibaan yoak ya ompasiar a manakar no kayari min mantungtong ed kabukoran nen Sr. Ibarra."
"Abuloyan ka mi pay Katageyan yo ya mangipasakbay," kuanen pári Salví ya maoyamo, "ya si Sr. Ibarra et excomulgado. . . . ."
Ag pinasumpal nen Kapitan General a nankuan:
"Maliketak ya aliwan ambelat so sakit a liliknaen nen pári Dámaso tan ilaloan kon matua so yabig ton aminpinsan, ta manlapod matatken la mairap la anganko ed sikto so manbaroy ya ompawil ed España ya man-
