paabig.(1) Balet ta walad sikatoya . . . . tan natan.. alilaen komoy Dios a Katawan iray Kagalangan yo ta sikatoy pirawat ko lawas!"
Sakey tan sakey ed saramay papári pinmaway lara.
"Talagan walad sikato!" kuanen pári Salví ya inmerémeré nen ompaway.
"Nanengneng la no siopay makaonan onsipot a manbaroy ya onarap ed España!" kuan ya impatumbok na sakey met a pransiskano.
"Onlaak la natan a tultuloy !" kuanen pári Sibyla ya mauges so uló to.
"Ontan mi met, ompawil kami lad lúyag mi!" kuanda ran may agustino.
Sakey tan sakey ed sikara agda nitepel ya nisesengeg ed kasalanay sakey a pransiskano et ambetebetel so impisalita nen Sankatageyan a Kapitan General ed sikara.
Dimad kapaway ed salas naabet day Ibarra ya anankaili ed sikara ed pigpigay oras ni labat a linmabas. Ag ira nanbabanoan, balet ta dakdakel so imbagay matá ra ed impansasangalay nengneng da.
Si alcalde balet, nen akasipot lara may papári, inlugay to, tan pinasamano ton madildíli, et aglara akapantungtong ta nitanla may ayudante ya mangawit ed kinen Ibarra.
Nansabatan ira nen María Clara ed pinto, tan nambabangil met so inkuan na matá ran dua, balet ta saraman a balikas na matá ra, duman tuloy ed anengneng ed matá da ran may papári.
Baliwan ya aminpinsan si Ibarra. Pinmatnag a mareen tan angilúgay a magalgalang, anggaman say indalaw dad man ira may papári et singá angiter ed sikatey baleg ya álem na linawa.
Inabet nen Kapitan General.
"Balbaleg so liket na linawak ya mipasamano ed sikayo. Abuloyan yoak pan ipasen ta ka yon singa kadilíyan."
Tan unong na imbagá to nengnengnengen ton imimanoen a napatpatnagay liket na linawa to.
- (1) manbaroy ya ompawil ed España ya manpaabig — Nen saman a panaon say sanketakutan day papári ya dusa no walay agawa ran kasalanan, say pamapawil dad sikara ed España ta diman mapalaloy irap na panagbilay da ya aliwan singa diad Pilipinas a manbibilay iran singa millionario, sawaan day
kuarta tan gagalangen ya tatakotan iray katoowan.
