"Sinyor.... say abig na linawa yo....!"
"Say nanengneng kon pankelaw yo singa to súgaten so liknaan ko, ta labay ton ibagay agyo inilaloan so maong a pangawat kod sikayo: kabaliksan to sirin a panduaruaan yoy kaptekay panagnunot ko!"
"Say maaron pangawat yo, sinyor, ed sakey ya andi kabaliksan ya ouleyan na Sankatageyan ya Ari tayo, aliwan kaptekan, no ag panangasi."
"Maong, maong!" kuanen Kapitan General ya inyurong to tan inturó to met so sakey a yurongan ed kinen Ibarra, "natan nayarian tayoy mantungtong na daiset; apakpaknaan koy kagagawa yo tan imparungtal ko lad Gobierno na Sankatageyan ya Ari tayo so pilalek ko ya pangiter dad sikayoy sakey a pamagalang ed mababig tan mapangasin kanunotan yon pamaalagey na sakey ya eskuilaan.....No komon ta inmasingger kayon angipanon ed siak, malikeliketak met komon a dinmágop tan asamben ko la lagi agawan akapaermen ed sikayo."
"Impasen kon magmagter a kanunotan," kuanen Ibarran inmebat, "kanian agko ninunot ya onnepeg a mangabala ed sikayo ed karakel day aasikasoen yo; sakey ni makanepegan met so isingger kon onona ya agko luksoan so manonaan ya manouley ed sayan luyag."
Si Kapitan General inggalaw toy uló ton pangipatnag toy piabobon to, tan intuloy toy nansalita ya manloor so pididíli to:
"Nipaakar ed agawan sakit na uló yo niman nisesengeg ed kinen pári Dámaso, agkayo labat mapaga tan ekal yo met lay imbel na linawa yo, ta ag nadiwit so anggan ngoroy buek yo legan kon manouley ad sarayan Kapoloan; tan nipaakar met ed inka excomulga yo, siak so akauley a misalita ed Arzobispo, ta amta yo la, nakaukolan ya itukoy tayoy inkasikatayo ed naugaliyan. Dia ag nayarin iparungtal ya elekelekan iraya ya singá diad Peninsula (1) ono diad Europa ya atagey lay asabi aral tan kakabatan. Ontan man, makana lawas a manggimper kayoy daiset ed arapen: pinmasen kayon akiarapan ed saray Togiop day Papári ya diad kipapasen da tan kayamanan da et manepeg iran galangen. Balet ta tulongan ta kayo, agta kayo paulian ta labay ko ray ma-
- (1) Peninsula -- Sikatoy pananawag da no arum ed España.
