ong ya anak, labay kon nagalang lawas so pakanunotan ed saray ateng; siak ontan ko met ya inarok tan nanlingkoran ko ray ateng ko, tan bukor na Dios labat so makaamta, no anto met kasi ginawak no wala ak ed pasen yo. . . ."
Insan biglán sinalatan toy tungtongan ya inkuanto:
"Nangelan ko ya nanlapó kayo ed Europa; akakar kayo ed Madrid?"
"On, sinyor, nanayamak diman a pigay bulan."
"Antoy nangelan yon nipapaakar ed saray boleg ko ey?"
"Kasiposipot yon tuloy nen apagalanganak ya nikabat ed sikara."
"Akin sirin et anggapoy awit yon sulat dan pangiapireng yod siak ed inkasikayo ey?"
"Duaray makasengeg, sinyor: nen nanlapoak ed España wala ni ray tinutuloy kon arum iran bansa,agak dia pinmuntan tampol, tan sakey met, manlapod nangelan ko lay walna yo, inisip kon say sakey a recomendación et aliwa labat lan ag nakaukolan no agta makapasakit ni ingen: diad panangasikaso tan pananulong yod sikami, amin kamin pilipino singa kami la inrecomenda ed sikayo."
Akaimis si masiken a militar tan inmebat a matantantan a singa to susukaten tan sisimbangen iray salita to:
"Panliketan koy ontan a panagnunot yo, tan...talagan ontan so manepeg. Balet ta amtayo met a petepeteg no anto ray sasakbaten mi dia ed Pilipinas. Dia, sikamin mamatatken lan militar, gawá min amin so gagaween, tan pasenan mın amın so kipapasen: nakaukolan ya ompasen kami ya Ari, Ministro de Estado, de Guerra, de Gobernación, de Fomento, de Gracia y Justicia, etc., tan say lalon irap ta amin a pamaakaran nakaukolan ya ipanon mi ed ontan lay kaarawi ya Ina tin España ya abobonan to ono andi ray iparungtal mi, ya no arum et palaran met lay nagagawa to. Unong na kuanmi lantin kakastila ya akoen ko met so katuaan to so 'Say toon ontanlay karakel na gagaween to, daiset so naasirta to!' Sakey ni onsasabi
- (1) Ministro - Sikatoyay pananawag ed Secretario na Gabinete nen saman.
