kor labat na uley so makapangiter, a saya nagamoran labat ed ilabás na andukey a taon ya andi tondan kimey tan nalnalan pamasimbalo ono pangumán ed saray onkukurang natan a totuntonen ed Uley dia."
Si Kapitan General ninengneng toy Ibarra ya inimimano, kanenengneng yan pinalabas nen Ibarra ya ag balot abaliw so lupa to odino agagá.
"Onaona kayon too ya maptek tan susto ed panagnunot ya akisalitaan ko ed sayan bansá!" kuanto ya bansag na impamasamano to.
"Kuanyo tan ta saray anengneng tan apilimugan yon anggad natan et sara labat so manaayam a liberliber ed siudad, ya agyo ni ra adalaw so napapauges ya alolong ed saray kabalbáleyan. No andi komon dakdakel met iray arumog yon totoo, Sankatageyan a General, a maptek tan susto ed panagnunot, no say panukatan yo et say kiwala ed sinansakey ed sikara na maabagey a puso tan yanoyano ran ugáli."
Inmalagey si Kapitan General a nanpasiapasiar ed biek tan biek ton may salas.
"Sinyor Ibarra," kuanto ya biglan tinmonda, — si Ibarra inmalagey a tampol — "nayarin onsipot ak ed loob na sakey bulan ya ompawil la ed España; say aral yo tan say panagnunot yo ag ira ontukoy ed ugáli na sayan bansa. Ilako yo lan amin iray daldalin yo tan arum niran nilako ya kayamanan yo, insan kila manbalkot ta mila kilad siak ed Europa. Isipen kon mas maliket kayon manbilay diman."
"Agko nalingoanan iray abig na linawa yod siak legan kon manbilay!" kuanen Ibarra ya akasibeg; "balet ta isipen kon nepeg koy manbilay ed bansa ya nanbilayan day áteng ko. . .
"Ya inateyan da, kuanyo, mas susto ni! Manisia kayod siak ta mas ni anganko so pikakabat kod bansá yo nen say pikabat yon díli. . . . . Ah! Nanunotan ko manaya," kuanton nansalat na tonoy bosis to, "ya araparapen yoy mankasal ed sakey a marikit a nisaponay abig tan kalimgasan, insan ta kayo balet aabalaen dia. Lakila sirin, lakila ed diking to, tan piano anggapoy makasbel ed pantuyaw yo, ibaki yo diad siak si ama to." kuanton inaróm a makakaimis. "Agyo lili-
