ngoanan balet a labay kon ibaan yoak a manpasiar naani."
Angigalang si Ibarra insanla pinmaway. Si Kapitan General tinawag to may ayudante to.
"Makaliliket ak!" kuanto ya tapok tapoken tod takeb; "natan ko la anengneng a say sakey a too et nayarin ompatnag a maong a kastila ya agto met isaginonor so abig na inkapilipino to tan say panangaro tod dálin ton nianakan; natan nipanengneng ko met a siansia ed saray papári ya aliwan amin kamin manouley dia et onkanan ababáley da: initdan toak na angikukoan ko nian tubonbalo tan ilaloan kon diad maganón agew et akabales ak lad anggan anto ni ran impakapaingungot dad siak na papári. Agay la, ya nasabisabí lagi agew a sayan tubonbalo et..... balet ta, tawag moy alcalde!"
Saya linmoob a tamtampol.
"Sinyor alcalde," kuanen Kapitan General nen kasabi to, "ta piano naparaanan lan ag napidua ray agawa nen ugto ya abantayan yo, agawa ran liknaen kon tuloy a napaabeba ray galang na uley tan ontan met ed amin itayon kakastila, ibilin ko pay malmalet ed sikayo so pangasikaso yod Sr. Ibarra ta piano aliwa labat lan naala ton amin so nakaukolan to ed pakapangilulot to ray kanunotan ton makapaabig tan makapaaliguas ed bansá, no agta pian dia met ed arapen et anggapoy makasigensigen ed sikato ran totoo ya anggan antoy kipapasen da tan anggan antoy panbaraanan dan makasengeg."
Atalusan nen alcalde so panetetel nen Kapitan General ed sikato, tan intewek to ya pangisanib toy inkabaingan to.
"Paibaga yo met ya ed alférez ta sikatoy manouley ed sayan pasen, tan soysoy yo pa met no tua ya saya et wala ray gagaween ton ag manepeg a sumlang ed totuntonen iran ganggan, ta dakdakel lay sinmabid layag kon dalem a nipaakar ed saya."
Nitanlay Kápitan Tiago ya mapinepineng a nakaronias so apangat ed sileng na kawes to.
"Don Santiago," kuanen Kapitan General ed sikato ed tonon maararo, "kaykayari ta kayo nin penilisitaan ed baleg a kapalaran yo ed impananak yoy singa
