si Sinyorita de los Santos; natan labay ta kayo met a pelisitaan nisengeg ed mamanugangen yo: say sankakalakalan ya anak a bii makana met a kanepegan toy sankaabigan a mibabáley ed Pilipinas. Nayarin kabaten no kapigay bansal?
"Sinyor!" kuanen Kápitan Tiagon makalkalna ya punas a punas na managagos a linget ed muling to.
"Ah, no ontan sirin anggapo ni inggeter ya agew! Amta yo la, no kulang so manganak ed sikara, maliketak a mikompari ed sikayo. Onkana met a pakalingoanan koy makapoy iran nangnangelan ko ed saray arum ya akibansalan kon angaanakan kon anggad natan!" kuanton inmarap ed kinen alcalde.
"On, Sinyor!" kuanen Kápitan Tiagon inmebat ya imis toy makapasinagem.
Batikbatikan la wari Ibarra ya manaanap ed María Clara ta akamayamay so labay ton ibaga tan tongtongen ed sikato. Nangel toy masaysayaksak iran mantotungtong ed sakey ed saray silir tan diman inmarap a tinmoktok ed pinto.
"Siopa tan?" kuanen María Clara ya anepet.
"Siak!"
Tinmonday tongtungan, balet..... agda nilukasay pinto.
"Siak, nayarian koy onloob?" kuanto lamet a mapalaloy panpokal na pagew to.
Siansian anggapoy inmesel. Nagogonoyan, nangel toy anlemlemew a panangakar a manasingger ed pinto, tan say maligan bosis nen Sinang ya intotob toy sungot to ed abot a pananombukan:
"Crisóstomo, onla kami ed sarsuila naani no lábi; isulat mo no antoy labay mon ibaga ed María Clara."
Insan masigsiglat ya inmarawi akar to ya singa insingger to.
"Anto kasi kabaliksan to nia?" kuanen Ibarra ed bosis ton singa labat inesaes ya nengneng toy sinonunot tan matantantan lan inmarawi ed samay pinto.
