Kalábi to, nen akaselsel laran amin so parol ed dorongawan day kaabongan, pinmaway lamet so líbot a komapat lan agew ya ipaway to, ed makatelek ngolan kalangakang day kampana tan andi pandenglan a tanol day bomba tan palpaltog.
Si Kapitan General a nanpasiar a nanakar a kaolop to ray duaran ayudante to, si Kpn. Tiago, si alcalde, si alférez tan si Ibarra, ya walarad manonaan da ray guardia civil tan arum ni ran manouley ed báley a mamapapaliis na totoo ed dalanen da, binagaan nen Kápitan a mamalabas na líbot ed abong to ya walay impaipaalagey ton entablado ed arap a panbasaay sakey a loa (1) ya pamagalang ed Masantos a Patron.
Agla komon dengelen nen Ibarra yan anlong ta mas lablabay to lay mamalabas na libot ed abong nen Kápitan Tiago ta atilak dimay María Clara ya iba to ray amimiga to, balet labay nen Kapitan General a dengelen tan manlapo ed agto met nataynan, kapilitan a tinmilak met tan pinasarag to lan ligliwa toy pannonunot ton diman to la nengnengen ed sarsuila no lábi.
Ginmapoy líbot a manonaan iran pinmaway so taloran sakristan a nan guantes a nanawit na ciriales a pilak; manomtumbok iray ugugaw a manaaral ya iba ray maistro rá insan saray ugugaw ed báley ya agsi awit iray parol a papel a nambabangil ya itsura tan kolor va impuputan ed ngoroy kawayan a manaalaay dukey da ya pinaparakep na bengat lad tan a napaabig na ugaw a nanggawá, ta sarayan awit dan silew sikaran díli akangastos. Malikeliket iran manusumpal nian
- (1) Loa — Anlong a ginagalan insulat a pamagalang ed sakey a mablin inkatoo ya isalaysay to ray makapakelaw tan ankablin gawgawa to, tan ontan met na daydayew irad sikato.
