impabetang ed sikara na matanda sa nayon; (1) kanian sakey tan sakey agsi nunot no panoy panggawa toy parol to ya sabitsabitan toy nambabangil a pamarakep tan peketpeketan to met na laylay iran ankelag, ya amin iraya nakaukolan ya itukoy to balet ed walan kuarta to, insan to sileway puter na kandilan lilin no walay napikerewan ton kanayon to ono kaaro ton sakristan, tan no anggapó, manaliw lay kandilan melag ya ambalangá ya singa isisilew day intsik ed altar da.
Wadman iray alguacil, ed kipapasen dan mananimbang na katonungan, a sikaray manbabantay a basilbasil tan liberliber a manaasikaso pian ag napolpultot so dasig day mililibot tan piano agmet ira manbobonton so totoo; ya diad saya biek tan biek ipepekpek da ramay awit dan varan kiew a tanday eegnaan dan betang, ya ipepekpek da nimet ya andi dankaan ya inisip da lágin samay kasil na panangipekpek da et makapangiiter na galang tan karlangan na líbot, ya onkanad kaabigay kamarerua ray nasasakitan, tan kitanduroy gagaween iran mapasirayew tan napnoy pangta ya ipapaakar ed religion.
Legan da ran may alguacil ya maniiter a gratis na sarayan makapasantos iran pekpek, walara met so manbubunog na kandilan lilin a nandudumaay kinakabaleg ya iiter da met labat lan anggapoy bayar a pamaliket da met la lági linawa da ran may totoon apekpek.
"Sinyor alcalde," kuanen Ibarra ed bosis ton makalna, "saratay lewet tan pekpek ay dusay kasalanan iratan odino diad liket labat lan panlewet tan panpekpek?"
"Susto tay ibabaga yo, sinyor Ibarra!" kuanen Kapitan General ta nangel toy tepet tonia; "sayan nababantayan a panagduksa ya kagagawa nira nen inmonan panaon nen agni asileway kanunotan day totoo,
- (1) matanda sa nayon -- Masiken ed barrio. Sakey yan pakanengnengan na niduma ten mabulbulos a panangiter na gapoy pakauley ed sarayan báley. Say tatawagey masiken ed barrio, nayarin matatken la nayari met ya andini, balet ta ag penduaruaan a sikatoy indion lawas masulong ed saman a pásen, tan sankabalgay pakayari manlapod sustoy panagnunot to tan masekder so linawa ton manulong ed saray kalugáran to. Anggapoy titulo to, anggapoy nannombra ed sikato; balet ta apasal la ran amin a mamirbir ed talonggaring to tan panangiansakit tan pananulong tod sikara. Say pakauley to tutulokey amin day kalugáran to. Saray mangaasikaso ray ankakabaleg iran hacienda tan saray dilin kúra kekerewen day tulong to nian patriarca ya tatawagey matanda sa nayon.
