pankelawan day amin a makagagatin dian manlalapod arum iran bansá. Manepeg ya isebel ira komón."
Andi amtan makasengeg, say onaan a pinmaway a santos si San Juan Bautista. Kanengneng ed sikato napatnagan a tampol a sayan kapinsan na Katawan tin Jesucristo et agda papablien ya unong na totoo; tua ta saray bitking tan salí to malimlimgas iran nengneng day bitking tan salí marikit, tan say lupa to et andi dumá tod nengneng na lupay ermitanyo ya manaayam ed ungib ya anggapoy arum a gagaween to et mandarasal tan manpapairap na laman to, balet ta say angipatoonan ed sikato dagdaan ya andás a kiew a ngalngalin ag nanengneng nimet ta asaniban day pigaran ugugaw a narep so silew na parol da tan wadman iran manpipitpitan pian ag ira naimanon maong.
"Kasi ka met la !" kuanen pilosopo Tasio ed makalkalnan bosis to ya wadman ed lansangan a mamapalabas na líbot; "anggapoy nalam a kaabigan ed inonám diad tapew na dálin ya angipakabat na Magayagan Pasasabíyen, ni say intewek nen Jesus ed arap mo! Anggapoy nalam a kaabigan ed onman lan sigpot na pananisiam tan impanbilay mon napnoy simpit tan gimper, ni say impatey mon nisesengeg ed pangitatandorom ed katuaan, tan pangisekder mo ed alutolutom iran kanunotan: saray totoo mainomay da ra yan lingoanán, no anggapoy arum a niparungtal no ag bukod lambengat na kakanaan a díli. Mas ni agonggonam komón no nansirmon kay akotikotí ed dalem day simbaan nen say impanpulong mon napnoy layap na linawa ed kalawakan, -- a sikatoya natay naaralan mo dia ed Pilipinas. No komon ta say sinisiram et pabo inbis a durón, nankawes kay sutla ya aliwan katat na ayep tan ginmanpí kan akitipon ed sakey a Togiop day Papári. . . . ."
Akatonday masiken ed pansásalita to ta nitanlan manomtumbok si San Francisco.
"Kuanko la lantí!" kuanton intuloy a makakaimis na napnoy balaw, "saya ay inkarro. . . . . Dios ko, agay layan karro! Manlangalang ed silew tan napnapnoy parol a salming! Natan mo labat anganko asáli aliktob na ontan lan liwawa, Giovanni Bernardone; Tan agay
(1) Giovanni Bernardone - Ngaran ya nen San Francisco de Assisi ya angiletneg na órden day Franciscano, nen aliwa nin pári.
