"Nimay Santa ya kákawesan mi;' kuay marikit ya anak nen Kápitan ed saray sankaíli ra; "impabayes kod sikato ray singsing ko ta piano andi saew a makasegep ak ed tawen.
Saramay nanaawit na parol tinmonda ran kinompog da may intablado pian narengel dan inaong imay "loa", tan ontan met a tinmonda ra may sasantos: labay da met lagi ondengel, odino nayari met a say malabay et saramay mansasakbat ed sikara. Saramay nansakbat ed San Juan, nen naksawan la ran manaalagar inkakamarang da ya nanpapaknaan dan inggaton si San Juan ed dálin.
"Ompano manpasnok balet si alguacil,' kuay sakey.
"Antoy panpasnokan to ey? Dimad sakristia et akapireg labat ed sukong ya akuykuyapotay tapá!"
Tan si San Juan nen akagaton ed dálin anggapó met lay dumá to kalamor ed saramay totoon wadman ya aliling toy sakey met la ed sikara.
Saray bibii manomtumbok ira ed Santa María Magdelena, salambengat ta aliwan saray ugugaw so walad onaan a singa diad pulok day lalakí, no agta inmona ray akukulaw insan insampot day mamarikit ya anggad kawalaay karroy Virgen, insan manomtumbok si kúra ya walad silong na palio. Say angigapó nian ugáli si pári Dámaso ya inkuanto: "Say labay na Virgen saray ugugaw aliwan saray akukulaw," tan anggan antoy pansibangot da ran may akukulaw, si Virgen ag nansalat na gusto to.
Manomtumbok si San Diego ed Santa Magdalena, anggaman anggapó met so nanengneng ya impakaliket to bilang ed saya ta siraraan met nin marmaermen so lupa to ya anggapoy naomanan tod itsura to nen kabuasan nen walad beneg nen San Francisco. Anemiran Hermanas Terceras so mangúguyor ed karro to, ya ag amta no anton sipan ono sakit so makasengeg, balet ta inopoopot so anganggaan dan mangúguyor. Kapetek dad samay intablado intondá ra met tan wadmay San Diego ya manaalagar na mangigalang ed sikato.
Balet ta nakaukolan ya alagaren so karroy Virgen a manasingger met lan manomtumbok ed totoo ran nansusukbot a singa ra anyani ya ataktakot iray ugugaw ya akanengneng tan ginapoan day manakis iramay an-
