yan masegsegang kalamor a kabaliksan toy singa binantiwel nen Kápitan? Saray manbabasa nia, ananam da la niman nen kabuasan so sirmon nen pári Dámaso,
tan agmi la ra labay a palunggitan a maong a parengelay ontan lan karakel na makapakelaw. Sakey ni, nayarin si pári Dámaso et onimbel so linawa tod sikami no yanapan mi katagam to, tan agmi labay yan
nagawa, ta diad sankabalgan a panangasi Dios totoo kamin lawas maliket ed deey panagbilay. Kasumpal
ton may loa, tinmuloy so líbot, ya intobat met kalamor
nen San Juan so masegsegang a kurang to.
Nen kapetek na Virgen ed abong nen Kápitan Tiago inlugay na mangatatawen a kansion ed salita ran impangibanoy arkángel. Sakey a bosis a matamtamoy, masamsamit tan masinsintimiento ya aliling toy mikakásin mannangnangis ed pangakanta toy Ave María nen Gounod ya aakompanyaan toy inkasikaton díli ed piano ya singa iba ton mikakási. Tinmondan singa amemet so tugtog ya angulop ed líbot, apaer met so dasal, tan si dílin pári Salví atakder met. Diad ermen ton may bosis a mangakanta, makapamayegmeg na liknaan tan makapaterter na lua: aliwa labat lan sakey a panangílugay, no ag sakey met a pikakási tan tagleey.
Sankarengel nen Ibarra man a bosis ya anggad man ed dorongawan a panantandagan to tan puso toy alimbós na pága tan kaermenan. Atebek toy paniirap ton man a pagew ya ibebesngaw tod sakey a kansion, tan sinmabi pága ton manepet ed inkasikaton díli na makasengeg ed saman ya ermen.
Mabinbinta ya maerermen so lupa to tan sinonunot ya asabian nen Kapitan General.
"Manbansag itayon mangan ta diman tayo salitaen iramay ugugaw a naandipat," kuanto nia.
"Siak pa lági akasengeg?" kuanen Ibarran makalkalna ya akaarap ed Kapitan General et agto balet nanenengneng. Insan to la tinombok a singa agto amtaygagaween to.
