Akin balet kasi et sikakapot ya amin iray dorongawan ed abong nen alferez? Iner kasi kawalaan to legay ilalabas na libot ya ag pinmanengneng imay biin singa lupay laki ya akaaysing na pranila, ono Musa na Guardia Civil? Atebek pa lagi nen Donya Consolacion so uges na kanengnengay muling ton nankukurosay birelbirel iran ulat a mangibubuyak na aliwa angankon dala no ag tuka tan apgo, tan samay balbaleg a tabako ya kalakalat a parakep na bibil to ran asireg ya
andekereket, tan say kanenengneng ton napnoy siblet ed kaabigan day arum, kanian sinmabid sikatoy panangasi tan agtola labay a deraley panliliket na katoowan
ed pangipanengneng toy itsura ton makapataktakut?
Ay! Diad pagew to anggapoy panangasi ta diad sikato sakeyan liknaan a nanbilay ed abayag lan linmabas a panaon a tatawagen day Panaon na Balitok, tan anggapo ia natan!
Ambilbilunget a maerermen so abong to ya anggapoy ni sakey a parol ni bengat lan amarakep a laylay, ta lapod malikeliket so baley ya unong na inkuan la nen Sinang. No anggapo labat komoy bantay a sondalo ya mamaspasiar ed arap na pinto nayari lan ibaga ya anggapod may manaayam.
Sakey a makuykuyep a silew so manisindag ed samay asiwaklat a salas a napaaninagan iray marindingot
iran kalansipay day dorongawan ya akuykuyapotan iray tapa tan dabok a kinmagit. Say Sinyora ed saman ya abong, unong na naugaliyan to akakotimeg a lanang, nayeyepyep ya akayurong ed sakey a silyon a baleg. Say impangawes to singa panangawes ton inagewagew, — aliwaliwa tan nayari nin ibagan makapataktakut. Akabaliber ya insiknol ed ul6 toy sakey a panyo, ya
