agoyagoy irad lupa toy antikey ya atilitili ran buek
ya agotgutgot; saman ni aysing ton pranilan inanágan
ya inlatop tod sakey ya aysing met ya ampoti lági nen
saman, anggaman agla nauksoy so kolor to natan, tan
say sapey ton pinmaspas, akapalkap a binmaliber ed
olpo to ran payos ya impantapewan to, ya anta nanaugip et manggalaw iran lanang. Ipogpugsó ton manlálapod sangi toy asewek a singa nanaalipanesan, ed
iner man a pasen a nibanan akalingawan to, no ilimata to ray matá to. No diad saman à oras et anengneng komon nen Don Francisco Cañamaque (1) abaloan to angankon sakey a cacique ed báley odino sakey a mankukúlam (2) insan tod satan parakepen so panungtong toy anengneng to na panagsalsalita ran ikakana rad tindaan odino panagsalitay kastila ya pikewet a ginawa ton dildíli ya intokoy ed nunot to ran pangikanaan.
Saman a kabuasan si Sinyora ag akimisa ya aliwan say agto labay, ta labay to met komoy panengneng ed saray totoo tan ondengel na sirmon; balet ta ag inabuloyan nen asawa to, ya diad impangisebel to, ibato ya singa unong lawas, so duara ono taloran salitan panamabaing, ayew tan pagiaw a pangidepak. Si alférez amta ton peteg a makapalpalek so panangawes nen asawa to tan anggapoy dumay nengneng to ed saramay tatawagen day kusiang day sondalo, kanian ibabaing to, ya agto labay a nanengneng da ran may atatagey ya inkatoon akipistan nanlapod kapital na lúyag, tan arum iran sankaili.
Si bii balet agto ya natalusan. Ipapasen toy inkasikaton malimgas, maong a bii, makaayayat, a saray kagagalaw to et singa ra awawey na reina, tan diad pakaisip to met mas maong nin mangawes tan lalo nin mabli ray kakawesen to nen si dílin María Clara; saya akatapis tan sikato et akasaya suelta. (3) Akaukolan ya asabisabin imbagá nen alférez so: "Tonda ka no labay mon agtaka sunsoney depak ya anggad p-------- ya báley mo!"
(1) Don Francisco Cañamaque Sakey ya opisial a kastila ya akansulat na pigaran libron nipaakar ed Pilipinas.
(2) mankukúlam - Manananem ono ibawanen.
(3) suelta Oniay panangibaga nen panaoy kastila no say bij et ag nantápis.
