Tinmonda ta agto met labay so ompawil ed báley ton nasunsoy depak, balet ta nonunoten to la no panoy pakabales to.
Anggan kapigan man, say ambilbilunget ya inkalupa to ag balot akaayat ya akapapireg ed sikato na siopaman, balet ta saman a kabuasan pati saray manaayam ed sikara sinmabi pága ra, lalo la nen sankanengneng dan akarakar dimad abong ya andi esel a nengneng toy mangigagaem. Say kanenengneng to andi dumá tod dalang na matáy uleg no akulong ya amta ton pekpeken odino temeken da la: ambetebetel, balet ta mandarlang, singa ontatalus, ya alabas nen ompepeket, makarimdimla tan masulsulit.
Bengat lan kalingoan ono kulangan day manaayam ed sikato, anggan antotan ya andi kakabaliksan a balon tanol, masulosulok lan panayewan toy maramsak, salita ran marutak a singa ontatalus ya itatampal ed kamarerua; balet ta anggapoy ontatalek ya onebat, ta amta da lan no walay onesel odino mangibagay katonungan to, kasalanan lamet iman tan lalon andukey so pasnok.
Sanagew ya onman to. Manlapod anggapoy nakulkol to ya napanpanggetan, ono napangibesngawan toy petang na uló to, ta si asawa to et binagaan lanti nen Ibarra, samay napopokpok a petang na ulô to manlour, singa mangeesep na apgoy lapag a liknaan to, ya asabí lan say amin a laman to et singa bilang napnoy korriente na electricidad a nayarin onterak a singa marumsis a bagyó ed anggan anton oras. Amin day nanenengneng to tewek iran ag palikas, ya aliling da ray dawá kasiplog na mabiskeg a dagem; anggapoy onsusumlang ed sikato, anggapoy nanengneng ton anggan melamelag a napangikukuan ton pangipanggetay petang na uló to: saray sondalo may manaayam ed sikato papaliisan day anggaay nayarian da.
Piano agto narengel so sayaksak tan panliliket day totoo, impaikapot ton amin iray dorongawan, tan ingganggan tod samay sondalon manbabantay ed pinto ya ag mamaloob na anggan siopa. Binerber toy uló toy panyo ya singa bilang mapagan ombetag, tan anta atagtagey ni agew, impaselselan to la ray silew.
