Unong na anengneng tayo, si Sisa inerel dan inawit ed kuartel ta kuanton may guardia civil a manggugulo ed báley nisesengeg ed insingger ton impeket ed samay toon akating a mipapayabol dimad plaza. Andidmay alférez ed saman, tan si masegsegang a bii nanayam ed kuartel a sanlábi ya akayurong labat ed bangko ya singa anggapoy walawalá ed sikato. Anengneng nen alférez nen kaimbuasan et manlapod mapaga ya no akarakar ed lansangan et narisgó ed onman lan karakel na totoo tan luganan, ta piano anggapo lay nagawan guló, agtoni impaibolos, no agta inbilin tod saray sondalo ya agda paalisen, balet asikasoen dan maong ya ag pasakitan tan pakanen da, kanian duay agew to lad man.
Sayan lábi, dia lágid impakangel toy marmaermen a kanta nen María Clara ta say abong nen Kápitan Tiago et asingsingger ed kuartel, odino diad arum ira lágin sinmabid layag ton anieweng ya akaliing ed nunot to na kanta to ra nen inmonan agew, ono bengat lad tan va akasengeg, si Sisa ginapoan to met so nankanta ed bosis ton masamasmit tan marmaermen, na saramay kundiman a kakantaen to ra nen marikit ni. Saramay sondalon wadman dedengelen da ya andi esel: nanonunotan da lági kalamor so agew iran linmabas, tan naliliing ed isip day naugip la ran pakanunotan ed inmona ran panaon nen makmaktek ni panagbilay da. Sinmabí met ya anggad layag nen Donya Consolacion ed onman lan kakaaborido to, tan nen naamtaan to no siopay mangakanta:
"Pasegep yo dian tampol!" kuanton ingganggan kayari impannunot ton aganó, ya nanengneng ed amagaan iran bibil te so anino bilang na sakey ya imis.
Inakar dad sikatoy Sisa tan saya pinmarungtal a mareereen ya anggapoy napatnag ed sikaton kelaw may takut; a singa bilang anggapod may anengneng ton Sinyora. Diad onia singa apasakitan so liknaan nen Musa ta say labay to lawas ya ipatnag et gagalangen tan tatakotan day amin a makanengneng ed sikato.
Sinmigam, sininyasan to ra may sondalo ya taynan da ra tan ginawat ton inalay akasabit a látiko nen asawa to insan to inkuan ed kinen ambagel ed bosis a makapakebiew:
