"Vamos, magkantar ikaw!"(1)
Mapilit la ya ag atalusan nen Sisa so labay ton ibaga, tan saya singa akapabetel na daiset ed petang na uló to, ta sakey ed saray marakep ya inkawalna to nian bii say pangipapasen ton agto amtay salitay tagalog odino pangipapatnag ton agto amta, kanian gagagalaen ton pipikewetey panagsalita to, ta piano diad ontan et ompatnag a singa lan petepeteg orofea (2), unong ed dílin panangibaga to.
Tan maong met lan oniay sinmeksek ed uló to, ta no panoy pangagagala ton pandederal na panagsalita toy tagalog lalon pikewet ni panangastíla to, nipaakar ed gramatica may panangibalikas to, ya anta ontan lay irap nen asawa ton mangibabangat ed sikato ya iba to lay depak tan pekpek na taburete.
Sakey ed saray sankananirapan ton impasal a bitlaen a salita ya lalo nin nanirapan to nen say impanirap nen Champollion (3) ed impanaral toy geroglíficos, say salitan Filipinas.
Say dengel so kaimbuasan ed impankasal to, nen mitotongtong ed asawa to, ya saya et kabo ni labat ed saman, nibaga toy Pilipinas; si kabo lapod asawa to, inisip ton nepeg ton ibangat, kanian tiniknolan to insan to inkuan: "Say panangibaga Felipinas! Agay lay inkamótit mo a! Agmo amta sirin ya ontay pananawag ed p-------- ya báley mo ta say ngaran to et nanlapo ed Felipe?" Si bii ta wala nid komapiton tawen ta kakkapankasal to ni lanti, tinmolok tan imbaga toy Felepinas. Si kabo singa manabig tan manasingger met lay impakangel to, balet ta tiniktiknolan to nin siansia, ta sikatoy panangarinyo to lági, tan inkuan ton iningal na daiset: "Agay ka met la saló a, agmo sirin nibagay Feline? Agmo lilingoanan..... amtam si Arin Felipe ya Komalima .... Ibagam so Felipe insan mo arumay nas a say talus tod latin et kapoloan day indios, sikato la tav ngaran na p-------- ya báley mo!"
Si Consolación ya pomepesak ed saman a panaon ya impiasawa to, pinopoyokpoyok to kalamor so uló ton
(1) Vamos, magkantar ikaw! -- mankokonkuanan a say ipapatnag to agto amtay salitay tagalog pian nibagan taga Europa, kanian oniay impangibaga to.
(2) Europa -- Bii ya taga Europa.
(3) Champallion Francisco J. Champollion, nibantog tan makabat a francés ya angipatalús na maamot tan mairap iran baliksánan ya itsuray daan
a panagsulat ed Egipto.
