Binenbenan tod sakey a lima tan legan ton sisikdakan na biek a lima to, sikaton dili ginapoan toy nanluklokso tan sinmayaw.
Atalusan nen ambagel a siansia so labay ton ibaga, tan intuloy to met lan nggagalaw iray taklay to anggaman andid kompás. Pinmatnag so imis ed saray bibil (on may manbabangat, ya singa imis na Mefistófeles (1) a bii ya akatanguyor na matudión ontumbok ed sikato ya bangatan to: wadman a nansasapon so panggula, panlemlemew, balaw tan duksa; sakey ya imis ya andi duma tod marumsis a panbitaktak.
Tan diad liket ton manbabantay ed dilin gawa ton sankasulitan, agto alikas so insabi nen asawa to anggad saya et biglan indepak toy makmaksil so pinto ya nilukasan.
Pinmatnag si alférez ya amespesiaw tan ambilbilunget so lupa to; atalusan ton tampol so nagagawad man tan niliragan toy ansakisakit si asawa to. Saya ag gininalaw, sankanengneng to ingen a napnoy balaw tan ag pangitaltalek.
Intapew nen alférez so lima to ya anggaay lemew ed takeb ton may nidumaduman sumasayaw, tan pina- tonda to. Linminaway balbaleg imay ambagel tan nankalkalnan inyurong tod man ed tabla ya inaagusay dalá to.
Anggapoy esel dimad salas: manlinlinaway ankakabaleg si alférez, tan banbantayan nen bii ya agto alisay matá ya singa bilang labay ton amtaen no antoy gaween to, insan to dinemet imay látiko tan tinepet tod bosis ton matantantan ya andi pagpaga:
"Akin ka ey? Agka labat angiter na maabig a lábi!"
Ag inmebat si alférez, no agta tinawag to may asistente.
"Awit mo yan bii," kuanto, "tan ibagam ed Marta ya itdan toy isalato insan to tambalen! Pakan mon maong, tan itdan moy katren dokulan to..... Wala ingey mandiwit ono mamasakit ed sikato akauley kayo!! Nabuas itolor ed abong nen Sinyor Ibarra!"
(1) Mefistofeles Sakey ed saray sankasebegan tan sankamakapanyari ed saray demonio ya onkokomadua ed Satanas a manonaan dan amin.
