Kapaway nen asistente tan si ambagel, inkapot ton inkalkalnay pinto, tinalakan to, insan to sininggeray asawa to:
“Say anapen mo amo yesyesen koy beklew mo!” kuanton, inelet to ray poniti to.
“Antoy agawam?” kuanen bii ya inmalagey tan sinmoner.
“Antoy agawak?” kuanton iningaingal ed bosis ton singa karol ya pinatumbokan toy sakey a maramsak a salita, tan insingger ton impanengneng so awiton papel a napnoy akutikutin sulsulat.
“Aliwan sikay nansulat nia ay ed kinen Alcalde ya ibabagam a papalkapan daak ta piano abuloyan koy sugal, sika p-------------- ? Agko amta no akin et agtaka yarekyareken!”
“Dalipa! Salim pa!” kuanton manelek a napnoy balew; “say manyarekyarek ed siak nakaukolan a mas walay inkalaki to nen sika!”
Si alferez nangel to man ya ambelabelat a panamabaing balet ta sangkanengneng to met imay latiko- Sininkat toy sakey ed saramay lipong dimad lamisaan ya mtopak ed ulo nen asawa to; saya ta apasal la ed sarayan tulot, inmekep a bigla tan si lipong dinmapon amisimisi ed dingding, tan ontan met so agaway tinmombok a tasa tan yoro.
“Payoti!” kuanen biin maningal, “antakut kan onsingger!”
Insan to nilukdaan a pamapetang to ni ulo to. Akuliteptepan si laki tan tinakbaan ton bansag na ineyag to; si bii balet diad makapakelkelaw a siglat binandabanda tod lupa na awiton latiko insan batik ed silir to, tan in kapot ton inpalalkab so pinto. Inabot nen alferez a maneyag ed sakit tan petang na ulo to, balet anganggad agawaan toy atupa to may linmalkab a kapot na pinto ya akasengeng lamet na nandasakan toy pinaspasia.
“Naayew komon ya amin so boleg mo, baboy, takong! Lukasan mo p----------- , p------------, lukasan mo, no andi betagen ko tay ulom!” kuanton maningal a ban sag na panpoponiti to tan pandedepak tod samay kapot na pinto.
Ag eebatan nen Donya Consolacidn. Sankarengel balet so ateet na tabtaburete tan baul ira, ya singa bi-
