ta aliwan in corde tan saray ibabaga ton in corde. Saraya labat so kaonoran so nayarin makapasakit ya unong nid inkidalan da: no in mente (2) et talagan wadtan lara ya walay makasengeg, odino nibalikas ira labat per accidens (3) ed petang na tungtongan."
"Siak, por accidens tan por siak amtak iray makasengeg, pári Sibyla!" kuay teniente ya sinmalangat ta nengnengnengen to lay kagogutgot na tungtongan nisesengeg ed nambabangil a pandurumaan ya ibábaga nen pári Sybila, tan mangaatap ni ingen a diad unor et sikato ni ompaway ya walay kasalanan. "Amtak iray makasengeg tan isalaysay ko ra pian akauley kilan mangibaga no antoy nandurumaan da. Nen aminsan a si pári Dámaso et inmalis ed San Diego, say párin katulongan to impunpon toy bangkay na sakey a toon nagnap ed kaabigan. . . . . on, nagnap ed kaabigan, amtak ta kabkabat ko tan tinmonda ak nid abong to. Tua ta ag mankokonpisar, et antov walad satan ey? Siak agak met mankokonpisar. Balet say pangibaga ran nanbitkel sakey a tilá, sakey a kapaklapan a pangekal na galang. Sakey a toon singa sikato ya walay anak ton sakey a lakí ya angisaponan toy panangaro to tan amin ya ilalo to, sakey a too ya mabilay so pananisia tod Dios tan amta toray kanepegan ton susumpalen ed kapara ton totoo, sakey a toon nagnap ed galang tan maptek a panagnunot, ag manbitkel. Sikatoyay kuanko tan pisalamatan yod siak, pári Dámaso, so agko pangidalatdat diay amin ya walad nunot ko." Insan to imbeneg imay pransiskano tan kuanton intuloy:
"Nengneng yo, sayan kúra kasabí to tan kayari ton pinairap si pangaskasiyan a párin katulongan to, impakutkot toy bangkay, impaekal tod kamposanto ya papaikutkot tod agko amta no iner. Say báley na San Diego diad inkapayoti to, ag inmesel; tuá ta dagdaiset so akapikabat: si inatey anggapoy anggan mogmon kanáyon to, tan say alenleneg ya anak to walad Europa; say Gobernador General balet akabatan to, tan manlapod toon maptek ya inkapuso kinerew toy dusá . .
(1) Manlapod puso. (2) Diad nunot.
(3) Ag ginagala.
