lang sasarelen toy pinto na amin a nigoyor to ran kagawaan. Manyegyeg so abong ed onman lan panagdepak
nen alferez a tekep toy nankakalatkat a samba.
“Agka onloloob, agka onloloob!” kuay anapakseng a bosis nen bii, “salsalim ya ibutay itay ulom, paltogen taka!”
Diad pakanengneng singa met la nankalkalnan binmetel so ulo nen alferez, balet ta anggapo ni tonda ton siansian pasiapasiar dimad pananganan ya aliling toy monanakap ya inkolung.
“Akseb kad man ed lansangan pian nabetelan itay ulom!” kuanto nin siansia nen bii ya susongosungoan, lalo la ta singa asumpal to lay impantranka ton may pinto.
“Nasinkat takan siansia, ni say Dios agtoka napiduan nanengneng, baboy, p----------- !”
“On! Ibagam labat ditay amin a labay mon ibaga!..... agmoak impimisa, anto? Sinebelan moak a manumpal na nabebetangan kod Dios!. ...” kuantod bosis a napnoy ampaipait a pasiki, ya anggapo la angankoy makaalig.
Dinemet nen alferez so sombriro ton metal, nanapiger na kawes toy daiset insan imanlan makmaksil so panangakar to, balet ta nagogonoyan, pinmawil a kurayat a nankalkahia ya ag balot nalikas so kondang to, ta inekal to ray botas to. Saray igaganggan da ta apasal laran maong ed saray kolkolan tan garapalan, nanaalipanesan lara no arum, balet ta say impandakat nen alferez ya inekal toy botas to, balon nanengneng da, kanian nankikindatan ira.
Inyurong nen alferez ed taburete ed ababay ton may masurin pinto, tan nan anos a nanalagai’ diman a kapalduay oras.
“Andi ka lad tan a tua, odino wadtan kani, sika kanding a bulog?” kuanton may bosis a tepeten kapag onlabas so pigaran bekta, ya mansasalat so ikakana ton panagmurmura tan panamabaing iran salita, tan mantagey so tono to.
Asabin siansian kinalkalnaan to la ran indederen ineekal iray kagkagawaan ya insasarel tod pinto; si alfesez dengdengelen toy tanol, tan manimimis.
