tan si pári Dámaso niyalis ed sananey a báley a mas maong. Sikatoyay amin ya agawa. Natan akauley kayo, pári Sibyla, ya mangiter na nandurumaan."
Tan kapangibalikas tod saya inmarawi ed saman a doipo.
"Liknaen kon tuloy so impakagamlit kon andi pikakabat ed sakey ya agawa ya ag komon nepeg a kalamiten," kuanen pári Sibyla ya naermenan. "Balet ta no kaabigan yoy inkiyalis yod sananey a báley. . . . ."
"Anto tay naalan kaabigan! Saray napirpirdid panalis..... Saray papipapil..... saray. . . . . tan amin a nabalbalang ey?" kuanen pári Dámaso ya inmeremeré ya agto napukpokay petang na uló to.
Nankalkalnan pinmawil so kareenan ed saman a doipo.
Sinmasabi ray arum a totoo ya walad sikaray sakey a kastilan masiken a piley a matamoy tan makmaulimek ya inkalupa ya tinmabin ed taklay na sakey a pilipinan akulaw ya amalikerker so kulet to, mapalaloy pintay lupa to tan amalakipak so polbos to, ya akakawes na kawes day sisinyoran kastila.
Saray wadman inlúgay dara ya ed maong ya impankakaaro; si Doctor de Espadaña tan si asawa to ya Doctora Donya Victorina, inyurong dad abay day totoon akabat tila. Walara met a nanengneng so sumusulat ed palapagan, tan komirsiante a kayari ran nanlulugayan et akarakar iran anggapoy amta ran gaween.
"Nibaga yod siak, sinyor Laruja, no antoy itsuray akanabong?" kuanton tinmepet nimay tubonbalo ya balangabalangaan so buek to. "Anggapo ni angikabat ed siak ed sikato."
"Inmakseb kono; agko met ni ingen anengneng."
"Dia ag nakaukolan itay ikabat," kuanen pári Dámaso ya sinmalabat. "Si Santiago sankaabigan a too".
"Sakey a lakín agto ininbintay pólbora," (1) kuanen Laruja ya impano.
"Sikayo met sinyor de Laruja!" inkuan nen Donya Victorina ed mansingsingin tetel na tonoy bosis to, ya
(1) Say labay ton ibaga sakey a toon makapoy ya uló,
