“!Napepetang! No anggapo lay iganggan yo, ompatanir ak la.........”
“Salamat, kaaro; maong komoy panbaroy yo......... ” abuloyan yo ak pa balet labat a mitepet; no isisipen yon ag manepeg ya ebatan, walad sikayo tan, ta agman onimbel so linawak.”
Intewek nen Elias.
“Panoy impakabaat yon may gulo lawari kalabian ey?”
“!Magmainomay!” kuay ebat nen Elias a singa anggapoy walawala;” saramay mangipapangulo duaran sanagi ya say ama ra et pinatey na Guardia Civil ed pekpek; sakey ya agew apalaran ko ran nilaban ed kaerel da met komon a singa inkagawa nen ama ra, tan bibirbiren da yan utang a linawa ed siak. Akisalitaan kora kalabian tan sikara lay akauley ya amaat ed saramay arum.”
“?Saratan balet a duaran sanagin inatey so ama rad pekpek........... ?”
“Nasompal met iran singa si ama ra,” kuanen Elias a makalkalna; “no say segsegang et apeketan toy sakey a boleg, napalanit iran amin ya ompatey; a singa met say karol no terakan toy sakey a kiew, nagalpong a manmaliw a dapol.”
Nanpatanir lay Elias nen anengneng ton ag inmesel si Ibarra.
Nen kabukbukoran to la nia, abaliw imay lupa ton inpatnag ton malinak ed arap nen Elias, a diman nipinta so liliknaen ton kaermenan.
“!Siak, siak so amairap ed sikato!” kuanton ma kalkalna. Insan nanpales a masigsiglat tan inmakseb.
Kapaway tod lansangan, sinabat na sakey a lakin melag, baliwan, tan piglatay balbaleg ed aping a kawigi ya angilugay ed sikaton maoyamo.
“?Antoy labay yo?” kuanen Ibarra.
“Sinyor, siak si Lucas, tan agik imay inatey karoman.”
“!Ah! Miliknaak ed sikayo . . • . . antoy labay yo natan ey?
“Labay ko komon a kabaten, sinyor, no pigay ibayar yo ed boleg nen agik.”
