Ayari lay pistay baley; saray totoo apapaway da lamet a singa nagagawan tinaon ya anggapo la wari keran kuarta ra, nansagpot ira, nanlinget ira tan nanpuyat ira, ya agmet ira nanliket ono akalmoy balo ran kakaaro ra, ya singa ra sinaliw na mapmabli so onman lan linmabas a gulo tan tanol tan say nala ran sakit na ulo.
Balet ta anggapoy walad saya; diad katangtaon onia lamet so nagawa, tan ontan met ed mantumbok a sanlasus taon, ta sikatoya lanti naugaliyan ya abangonan.
Diad abong nen Kapitan Tiago mapalaloy ernien: kapot ya amin iray dorongawan, mankulandit iray onaakai’ tan dia labat ed kosina so pakangelay salitan maksil. Si Maria Clara, ya aliling toy singa bilang kamarerua ya mangiiter na bilay tan sayaksak ed abong, mandokdokol ya agmakayari; tan say boblay to akapinta ed kaliipaan day wadman a singa pakanengneng ed lupay sakey a too na gonigon iray kamarerua to.
“Antoy pakaisip mo, Isabel, dinay mas maong a payabolan ko, say krus ed Tunasan odino say krus ed Matahong?” kuanton tinepet a makalkalnan may nagogonigon ya ama. “Say krus ed Tunasan ontutubo, balet ta say krus ed Matahong, onlilinget; dinay isisipen mon mas managmilagro ey?”
Nannunot si Tia Isabel, manpeyeng, tan inkuanton makalna:
“Ontubo.....say ontubo mas baleg a milagro nen say manlinget: manlilinget itayon amin, balet ta aliwan aming itayo et nayarian tayoy ontubo.”
