bansag na pamaypaypay to. "Panon met ni panginbinta toy pólbora no say kuanda man et ininbinta dalay intsik nen abaybayag lan siglo ey?"
"Saray intsik! Ambagel kayo amo?" kuanen pári Dámaso. "Ha! Ininbintay sakey a pransiskano ya kaparak, Pári Savalls tan agko nanunotan no anto nimay kaaromay ngaran to nen siglo. . . . . ya komapitó!"
"Sakey a pransiskano! Satan sirin a pransiskano nanayam ed China ya misionero, satay Pári Savalls," kuanen Donya Victorina ya inmebat ta aliwan madmainomay a mansalat na kanunotan to.
"Schwartz so labay yo angankon ibaga, sinyora." kuay ebat nen pári Sibyla ya akaarap ed biek.
"Antoy amtak ey, Savalls, kuanen pári Dámaso: tinumbok ko labat!"
"Savalls may Chevas, anto tay wala? Anggapoy manmaliw ya intsik nisesengeg ed sakey a batek," (2) inkuan ton may pransiskano ya mauges so uló to.
"Tan diad siglon komalabinapat, aliwan komapitó," intuloy ton imbagan may dominiko ed bosis ton singa mangibabangat, a singa bilang pamasiodot tod samay sakey.
"Maong, say pangiarum na sakey a siglo ono pangekal na sakey, agto met napanmaliw a dominiko!(3)
"Ay saló, ag kayo mamapasnok!" kuanen pári Sibyla ya makakaimis. "Ag lalon abig no ininbinta to la pian anggapo lay dakel a gaween day agági to."
"Anto may kuanyo, pári Sibyla, sanen siglon komalabinapat?" tinepet nen Donya Victorina ed baleg a pilit ton mikabat. "Kasakbayay inkianak odino inanak lay Kristo ?"
Kapalpalaran nen tinepetan to ta linmoob ed salas so duan katao.
(1) Sakey a párin alemán nen siglo XIV ya sikatoy kuan ya anginbintay pólbora (2) Say kalingo ed pamitlay ngaran agto kabaliksay kaumay katusen.
(3) Say kalingo met ed pangibagay panaon ya inkianak tan impanbilay na sakey a too, ag makaumay inkasikato. Sayaran panangibaga singa panamabaing ed saramay totoon zg ira makapalpalabas ed melag a lingo nipaakar ed bengat lan kabat lan maong so katuaen to.
