mapalalo met lay inkapoy day mata to ya nakaukolan
lan mabetbetbet ya ipakuyep to ra no walay nengnengen ton aragdawi daiset: say alenleneg ya ag angoman say inkawalna to.
Masarag lay kapalduay oras ya impantongtong da, akapantalosan iran tampol tan nampaknaan ira. Si bii labay to met komon kalamor so sakey a kastilan aliwan onong so pankitlaey to, inkaataata to, inkadoldol na buek to, inkangileb to, ya aliwa met lan onmay panpogsoy ilol to no mansalita, sakey a laki komon a mapasang tan walay inkatoo to, ya unong na isalsalita ton lanang; anggapo balet yan klasi kastila ya sinmingger ed sikaton tinmabi. Aminpiga lan nangelan to may kuanda ya “say panangipinta ra ed maong a panaon sakey a laki ya buek toy nandoldol” tan sinigsisia to met lan tua, ya si Don Tiburcio et kabaliksan to la bilang so “maong a panaon“ ya anggaman say adoldolan to lagi kalamor et say kapupuyat to ed panagnunot toy kairapay walan panagbilay to. Ta, siopa tan bii agla mannunot tan manpili ni no talomplo tan duay taon to la ya unong ed panagbilang ton dili?
Si Don Tiburcio met ed inkasikaton bukor singa nanaermenan ed pannodnunot tod pamalabas to ray agew no kapankasal da. Inimis to la kalamor a nanagamil na tepel tan ninunot to ya mogmo lan makapangiter na sekder to so makapataktakot ya anyani eras. Sikato sakey a toon anggapo ray paspasirayew to tan pilalek ton atagey; saray karamilan to mapaabeba, tan on tan da met na kanunotan to aliwa ran matekiab a mapaatagey; say puso to balet ya agnin balot angaro, pikugip to met nen ona so sananey a kalimgasan. — Nen wala nid kalangueran, bangno idokol to lad katri ton anawnawet, diad kayari ton mandem a naknaksawan ed satan ed inpankimey ton sanagew, panyepyepan ton onpipintad nunot toy sakey a malimgas a talintao ya maararo tan makakaimis. Diad panaakar na panaon nen manloor iray sagsagpot, irirap na linawa tan irirap na bilay, insan ag linmesay pikugip ton talintao, nampasimbaloy pilalek to, tan imbales ton pinunot so sakey a biin ma ong ya ugali, makuli tan walaay daiset a makaligliwa ed sikato no onsabin naknaksawan, tan manpasnok ed sikato met no arum. — On, asabisabi lan anunotan to
