a sikatoy iwiyen no nasakitan ed eras. Tan apasakey
so ebat to no walaray kaaro ton manbalaw ed sikato:
“Bilay moak ta anggan tawagen moak na ambagel.”
Si Don Tiburcio sakey ed saray totoon ingangaran ya ag makapatey na apangat; mapaabeba, aliwan malastog ono mapasirayew, tan anggapoy bubusolen ton anggan siopa; no nambilay komon nen inmona ran panaon, inangaangay toy manmisionero. Anggaman abaybayag la diad Pilipinas ag nanpatagey, agto impasey laman to ya napnoy kaabigan tan pakayari tan matalongaring, ya aliwan singa saray arum a kabansaan to ya anggano pigpigay simba da ni dia et singa lara nagnagnap. Diad puso to, ag balot akaloob so pankabusol, tan anggapo ni anengneng odino arumog ton anggan saksakey ya impasen ton filibustero; anganggad nanenengneng to totoo ran masegsegang a nakaukolan to ran panbilayan no agto labay so manmaliw a lalon masegsegang nen sikara. Nen idalem da la wari ed impankinon doktor to ag inmimbel so linawa to, ag nantalabutob; binirbir toy kaptekan, tan anganggad inebat toy onia: “Nakaukolan balet lanti manbilay!”
Nankasal ira sirin, odino sakey tan sakey et kinalotan to may sakey, insan linma ra ed Sta. Ana ya mamalabas na luna de miel; saman balet so labin impankasal da, nanliknay losok toy Donya Victorina ta aderal so eges to; akisalamat ed Dios si Don Tiburcio tan inasikaso ton ini win maong. Nen komaduan labi anungpal na nabebetangan to, tan diad kaimbuasan, nen manespejo, akaimis na maerermen ya anengneng irayngares ton naandian la ray ngipen: diad saksakey a labi singa tinmatken na samploy taon.
Si Donya Victorina anggapoy balbalawen tod kinen asawa to. Impaigawaan toy ngipen a postiso, impaidaitan toy akamayamay a kawes ed saray sankaabigan iran sastre ed Ibale. Nansaliw na luganan iran tatawagey “aranas’ tan kalesa, nanbilin ed Batangas tan Albay na sankaabigan iran kabayo ya isasagor, tan analiw ni duaran kabayon ilolomba, ta piano angga poy mangisaginunor ed asawa to.
Legan ton pasisimbaloen si masiken to, agto met kinainday laman ton dfli: inekal toy sapey a sutla tan
