“!No sakey labat lan de so iyan ko, say isip day totoo anggapoy de ya ibay apellidom, musmus!” kuantod asawa to.
“Anggapo lay totongtongen to say panpaparaan to ed panbaroy da; impapatlep to ray ngaran day pasen iran tondaan da tan balibalin dengeley panangibaga toy: “Nanengneng koy ismo01 ed canal na Suez; say kuanen De Espadana so marakerakep tan sikato antato ta aliber to lay enteron mundo” — odino: “Ngalngalin agak la anganko ompawil diad sayan bansa ray totoon salvajes” — No arum met niay ibaga to ay: “Talagan agak inanak a manayam dia; mas labay na laman koy Aden odino Port Said; ontan met lay isip kon nanlapod inkaugaw ko et ” etc., etc. Diad olo to say mundo Pilipinas labat tan Espana, ya singa saray chulos(2) a say pakaisip da et Espana tan Aanerica labat odino China ta sikatoy sakey a pananawag dad America del Sur nen saman.
Si Don Tiburcio amta ton peteg a dakel ed saray ibabaga nen asawa to et kaambagelan, balet agla oneesel ta piano agdala ingalan odino ipanunot so inkaataata to. Pian anggapoy duma tod saray arum a malokon, linmad ulo nen Donya Victorina so mannginew tan ginapoan toy nankawes na nambabangil a kolor, nanlalaso tan naniiyay rosrosas insan mamaspasiar ed Escolta ya akabata. Balet ta, alay kasulitan! Linmabas so taloy bulan tan naapay pilalek to, ta agmet tinmoloy so lokon to, tan maniapod anggapo lay makasengeg na pagaan to ya manmaliw a rebolusionarioy anak to, binaat to met lay panbaroy da. Nankokonsulta ed pigapigan doktor, manamianak ira tan akukulaw, et anggapoy agawaan da, tan maniapod aminsan et minurmura ton binabalaw si S. Pascual Bailon ed ontan lan inalipanes nen Kapitan Tiago, agto labay natay onapireng ya onkerew ed anggan siopan santo ono santa. Kanian oniay inbagad sikatoy sakey a kaaro nen asawa to:
“!Sisia yo ak! Sinyora, bukbukor yoy espiritu ya
mabiskeg ed sayan makapaaboridon bansa!”
________
(1) Makisir tan andukey a pirasoy dalin ya anekep ed duaran lalon maawang a dalin, singa bilang duaran continente.
(2) Pananawag dad saray totoon pilyo ed Espana ya mialaay bilay da ed saray gitamo ya anggapoy pete-peteg a panaayaman dan pasen.
