si Alcalde ya ontan, si juez ya onman, si tesorero, etc.,
ya atatagey irayan inkatoo tan onong ed pananalita to
masiadoy panamabli rad sikato.
“No sinmabi kayo komon karoman a sakey, Donya Victorina,” kuanen Kapitan Tiago nen akasalet a sinmalita,” abana yo diay Sankatageyan a Kapitan Gene ral: manyoryurong ditan.”
“?Anto? Panon? Nanlapo diay Kapitan General? Diad abong yo? Gagalawen yoak labat!”
“Tua, aliwan lurey! Ditay niyurongan to ed kawalaan yo natan! No komon ta sinasakbay yoy duay agew so insabi yo......... ”
“!Agay met la ya ag asasakbay so inkasakitan nen Clarita!” kuanton milmilay linawa to, insan inmarap ed Linares a nankuan:
“Nangel mo la prime? Tinmonda diay Sankatage yan a Kapitan General! Anto tan ey, atalusan mo la natan ya walay katonongan nen De Espadana ya mangibabagad sika ya say gantuloyan mo et aliwan abong na andi kakabaliksan ya indio? Ta nepeg yon antaen Don Santiago ya diad Madrid sayay kapinsan mi ay kaaro ray pigapigan ministro tan ontan da met na akamayamay a duque, tan mabetbet a mangakan ed abong nen Conde del Campanario.”
“Diad abong nen duque de la Torre, Victorina,” kuanen asawa to ya angibano.
“Sikato Ian lamang; say labay mo sirin a ibaga...?”
“Nasabik ira kasi di pari Damaso no laen ko ra ed baley a kawalaan da?” kuanen Linares a sinmalabat tan inmarap ed pari Salvi; “kuanda ta asinggei' dia kono.”
“Agyo la nakaukolan a laen ta wadia natan; onsabi la anganko nagonoyan” kuanen kura ya inmebat.
“!Mapalar ak sirin! Walay awit kon sulat ya iter kod sikara,’ ’ kuanen balolaki “tan no ag labat say magayagan inkibana ya akasengeg na akakaran ko dia, pinmegdat ak komon a dinmalaw ed sikara.”
Legan to nian pantotongtong da abangon imay “Magayagan inkibana.”
